ރައީސް އިބްރާހިމް މުހައްމަދު ސޯލިހުގެ މޫނުފުޅަށް ކުޅު ޖަހާ މީހަކަށް 50،000 ރުފިޔާ ދޭނެ ކަމަށް ތިމަރަފުށީ ދާއިރާގެ ކުރީގެ މެންބަރު މުހައްމަދު މުސްތޮފާ ޓުވީޓްކުރެއްވި މައްސަލަ ބަލަން ފަށައިފިއެވެ.
ފުލުހުން ބުނީ ޓްވިޓާ އެކައުންޓް "ތިމަރަފުށި" އިން ކޮށްފައިވާ ޓުވީޓެއްގެ މައްސަލަ އެ އިދާރާގެ ސަމާލު ކަމަށް އައިސްފައިވާ ކަމަށާއި އެކަމާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށެވެ.
ރައީސްގެ މޫނަށް ކުޅު ޖަހާ މީހަކަށް 50،000 ރުފިޔާ ދޭނެ ކަމަށް މުސްތޮފާ ވިދާޅުވި މައްސަލަ ބަލަމުންދާއިރު ދާދި ފަހުން ރައީސް އިބްރާހިމް މުހައްމަދު ސޯލިހުގެ ވެރިކަން "ލޭ އޮހޮރުވުމަކުން ވެސް ބަދަލުކުރަން ވެއްޖެ" ކަމަށް ބުނެ މާލޭ ސިޓީ ކައުންސިލުގެ ތަރުޖަމާނު މަރިޔަމް ޝިއުނާ ކުރި ޓުވީޓެއްގެ މައްސަލަ ވެސް ފުލުހުން ވަނީ ބަލަން ފަށާފައެވެ.
މަރިޔަމް ޝިއުނާ ގެންގުޅޭ ޓްވިޓާ އެކައުންޓުން ކުރި ޓްވީޓްގައި ބުނެފައި ވަނީ، "ބަޔަކު ވަރަށް ހައުކަށިކަމާއެކު ނުކުމެ މި ވެރިކަން ނިންމަން ވެއްޖެ. ކޮންމެ ދުވަހަކު އެތައް މުސްލިމުންގެ މައްޗަށް އަނިޔާވެރިކަން ހިންގަމުންދާ ޖައްބާރު، އިބޫސޯލިހް ހަމަބިމަށް ތިރިކުރަން ވެއްޖެ. ޓްވީޓް ކުރަން ތިބެގެން ވާކަށް ނެތް. ލޭއޮހޮރުވުމަކުން ވެސް ބަދަލު ކުރަން ވެއްޖެ" މިހެންނެވެ.
މިއަދު ހެނދުނު ޝިއުނާ ކުރި ޓްވީޓް އޭގެ ވަގުތުކޮޅެއް ފަހުން ވަނީ ޑިލިޓް ކޮށްލާފައެވެ.
ސޯޝަލް މީޑިއާ މެދުވެރިކޮށް ވެސް ލޭއޮހޮރުވުމަށް ގޮވަލައި، ޓެރަރިޒަމަށް ހިތްވަރުދީ ކުރާ ޓްވީޓްގެ މައްސަލަތައް ފުލުހުން ބަލަމުން އަންނަ އިރު މީގެ ކުރިން ވެސް ވަނީ ސޯޝަލް މީޑިއާގައި އެފަދަ ޕޯސްޓްތައް ކުރާ މީހުން ހައްޔަރު ކޮށް، އެ މީހުންގެ މައްޗަށް ދައުވާ ވެސް އުފުލާފައެވެ.
