މާލޭގެ މީހުންނަށް 2000 ގޯތި ދޭން ނިންމާފައިވާ ގިރާވަރު ފަޅު މި އަހަރު މެދުތެރޭ ހިއްކާ ނިމެނޭ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ރައީސް މިހެން ވިދާޅުވީ، އެމްޑީޕީގެ ރިޔާސީ ޕްރައިމަރީގެ ކެމްޕައިންގެ ތެރެއިން ރޭ ދަރުބާރުގޭގައި ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ، ގުޅިފަޅުގެ އެއްބައި ހިއްކާ ނިންމާފައިވާ ކަމަށާއި ދެވަނަ ބައި ހިއްކުމަށްޓަކައި ބޮސްކާލިސް ކުންފުންޏާ އެކު ފަހުގެ ނިންމުންތައް ނިންމަވާނެ ކަމަށެވެ.
މީގެ އިތުރުން ގިރާވަރު ފަޅު ހިއްކުމުގެ އަމަލީ މަސައްކަތް ވެސް ނިމެމުންދާ ކަމަށާއި މި އަހަރު މެދު ތެރޭގައި އެ މަސައްކަތް ފެނިގެން ދާނެ ކަމަށް ރައީސް ވިދާޅުވިއެވެ.
ރައީސް ވަނީ މާލޭ މީހުންނަށް ހުޅުމާލެއިން 1،000 ގޯއްޗާއި ގުޅީފަޅުން 2،000 ގޯތީގެ އިތުރުން ގިރާވަރު ފަޅުން ހިއްކާ ބިމުން މަދުވެގެން 2،000 ގޯތި ދެއްވާނެ ކަން އިއުލާނު ކުރައްވާފައެވެ.
ގިރާވަރު ފަޅު ރެޒިޑެންޝަލް ސިޓީއެއްގެ ގޮތުގައި ތަރައްގީ ކުރަން ރައީސް އިބްރާހިމް މުހައްމަދު ސޯލިހު މިދިޔަ މަހު ވަނީ ގަރާރެއް ނެރުއްވާފައެވެ.
މި ގަރާރަކީ ދައުލަތުގެ އާންމު މަންފާއަކަށްޓަކައި ހާސިލުކުރަން ބޭނުންވާ އިގްތިސާދީ ސިޔާސަތެއްގެ ދަށުން ހިންގާ މުހިންމު މަޝްރޫތައް ކަނޑައެޅުމަށް އެކަށައެޅި ގަރާރެކެވެ. އެ ގަރާރުގައި ވާ ގޮތުން ދައުލަތުގެ އާންމު މަންފާއަކަށްޓަކައި ހާސިލްކުރަން ބޭނުންވާ އިގްތިސޯދީ ސިޔާސަތެއްގެ ދަށުން ހިންގަން ކަނޑައަޅާފައިވާ އެ މަޝްރޫއަށް އެންމެ ދަށްކޮށް ހަރަދު ކުރެވޭނެ އަގަކީ ފަސް މިލިއަން ޑޮލަރެވެ.
މިދިޔަ އަހަރުގެ ރިޔާސީ ބަޔާނުގައި ރައީސް އިބްރާހިމް މުހައްމަދު ސޯލިހު ވިދާޅުވީ، މާލެ ކައިރީގައި އޮންނަ ގިރާވަރު ފަޅު ހިއްކައި އެ ތަނުން މަދުވެގެން 2،000 ގޯތި މާލެ މީހުންނަށް ދޫކުރާނެ ކަމަށެވެ.
