2022 ވަނަ އަހަރުގެ ބައިނަލްއަގްވާމީ ނުކުޅެދުންތެރިކަން ހުންނަ މީހުންގެ ދުވަހުގެ ރަސްމީ ޖަލްސާގައި 9 ފަރާތަކަށް ރިވެލި ތަރި އެވޯޑް ދީފިއެވެ.
ރޭ ރ. އަލިފުށީ ސްކޫލުގެ މަލްޓި ޕާޕަސް ހޯލްގައި ބޭއްވި މި ރަސްމިއްޔާތު ޝަރަފުވެރި ކޮށްދެއްވައި، ރިވެލި ތަރި އެވޯޑް ހާސިލްކޮށްފައިވާ ފަރާތްތަކަށް އެވޯޑް ދެއްވީ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހެވެ.
ރިވެލި ތަރިއަކީ ނުކުޅެދުންތެރިކަން ހުންނަ މީހުންނާއި ކުދިންނަށް ހާއްސަކޮށްގެން ބާއްވާ ރިވެލި މައުރަޒުގައި ބައިވެރިވެ އެކި ދާއިރާތަކުން ވަނަ ހޯދާފައިވާ ފަރާތްތަކަށް ދެވޭ ހާއްސަ އެވޯޑެކެވެ. މި އެވޯޑްގެ މަގްސަދަކީ ނުކުޅެދުންތެރިކަން ހުންނަ މީހުންނާއި ކުދިންގެ ކިބައިގައިވާ ހުނަރާއި، އުފެއްދުންތެރިކަން އާންމުކޮށް، މަސައްކަތްތެރި ކަމާއި ވިޔަފާރި ކުރިއެރުވުމަށް ޝައުގުވެރިކަން ހުންނަ ފަރާތްތައް ބާރުވެރިކޮށް އެކަމަށް މަގުފަހިކޮށް ދިނުމެވެ.
18 އަހަރުން ދަށުގެ އުމުރުފުރާއިން ރިވެލި ތަރި ހާސިލްކޮށްފައި ވަނީ:
- އަތްތެރި މަސައްކަތްކުރުމުގެ ދާއިރާއިން މުހައްމަދު ދަރްވީޝް ޝަޒީނު، ހ. ހުވަދޫ / މާލެ،
- އަމިއްލަ އުފެއްދުންތެރިކަމުގެ ދާއިރާއިން އާއިޝަތު ޔަމްނާ މުހައްމަދު، ހީނާމާގެ / މ. މުލައް،
- ކުރެހުމުގެ ދާއިރާއިން އާމިނަތު މިޝްޔާ މަމްދޫހް ހަމްދުﷲ، މ. ބަބުކެޔޮގަސްދޮށުގެ / މާލެ، އަދި
- ކާބޯތަކެތި ތައްޔާރުކުރުމުގެ ދާއިރާއިން ފާތުމަތު ޝަފަގް، ރެޑިއަމުގެ / ތ. ވިލުފުށިއެވެ.
18 އަހަރުން މަތީގެ އުމުރުފުރާއިން ރިވެލި ތަރި ހާސިލްކޮށްފައި ވަނީ:
- އަތްތެރި މަސައްކަތްކުރުމުގެ ދާއިރާއިން ހަސަން ގާސިމް، ބޮކަރުމާގެ / ރ. އަލިފުށި،
- އަމިއްލަ އުފެއްދުންތެރިކަމުގެ ދާއިރާއިން ސާމިޔާ އާދަމް، ރެޑިއަމްގެ / ހދ. ކުޅުދުއްފުށި،
- ކުރެހުމުގެ ދާއިރާއިން ހަސަން ޝާޒްލީ، މާކޯނި / ގދ. ތިނަދޫ، އަދި
- ކާބޯތަކެތި ތައްޔާރުކުރުމުގެ ދާއިރާއިން އާމިނަތު ޖިހާދާ، ތަރިކަ / ސ. މަރަދޫފޭދޫއެވެ.
މީގެ އިތުރުން ދަނޑުވެރިކަމުގެ ދާއިރާއިން އާއިޝަތު އާދަމް، އޮޅުމަސްގެ / ރ. އަލިފުށިވަނީ ހިތްވަރު ދިނުމުގެ ހަނދާނީ ލިޔުން ހޯދާފައެވެ.
މި ހަފްލާގައި ނުކުޅެދުންތެރިކަން ހުންނަ މީހުންގެ ގައުމީ ދަފުތަރުގެ ޑިޖިޓަލް ޕޯޓަލް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހްމަދު ވަނީ އިފްތިތާހްކޮށް ދެއްވާފައެވެ. އެ ދަފްތަރަކީ ނުކުޅެދުންތެރިކަން ހުންނަ މީހުންނާއި ކުދިންގެ މައުލޫމާތު ފެސޭހައިން އަދި ރައްކާތެރިކަމާއެކު ބެލެހެއްޓޭ ގޮތަށް ގާއިމްކޮށްފައިވާ ޑިޖިޓަލް ރަޖިސްޓްރީއެކެވެ.
ކޮންމެ އަހަރެއްގެ ވެސް ޑިސެމްބަރު މަހުގެ 3 ވަނަ ދުވަހަކީ ބައިނަލްއަގްވާމީ ގޮތުން ފާހަގަ ކުރާ ނުކުޅެދުންތެރިކަން ހުންނަ މީހުންގެ ދުވަހެވެ. މި ދުވަސް ފާހަގަކުރުމުގެ މަގްސަދަކީ ނުކުޅެދުންތެރިކަން ހުންނަ މީހުންނަށް ވެސް މުޖްތަމައުގެ އެހެން ފަރުދުންނެކޭ އެއްފަދައިން ދިރިއުޅުމުގެ އެންމެހައި ކަންކަމުގައި ފުރިހަމައަށް ޝާމިލްވެވޭނެ މާޙައުލެއް ގާއިމްކުރުމަށް ބާރުއަޅައި، މިހާރަށް ވުރެ ބޮޑަށް އެފަދަ ފުރުސަތުތައް ފަހިކުރުމަށް މަސައްކަތް ކުރުމެވެ.
