ލޮނުޒިޔާރަތް ޕާކުގެ "ވޯކްވޭ" ހަދައި އެ ވޯކްވޭތަކުގައި ޖެއްސި ކުލަތައް އާންމުންނަށް ކަމަކު ނުދިޔައެވެ.

މީގެ ދެ އަހަރު ކުރިން ކުރީގެ ކައުންސިލުން ތަރައްގީކޮށް ހުޅުވި ލޮނުޒިޔާރަތް ޕާކުގެ ހުރިހާ ކަމެއް ވެސް ބަލަހައްޓަނީ ކައުންސިލުންނެވެ. މީގެ ދެ ދުވަސް ކުރިން ކައުންސިލުން ވަނީ އެކި ޑިޒައިންތަކަށް ވޯކްވޭ ފަރުމާކޮށް އެ ތަންތަނުގައި ތަފާތު ކުލަ ޖައްސައިފައެވެ.

ނަމަވެސް އާންމުންގެ ތެރެއިން ގިނަ މީހުންނަކަށް މި ބަދަލު ކަމުނުދެއެވެ.

ގިނަ ބަޔަކު ކައުންސިލްގެ މަސައްކަތަށް ފާޑުކިޔާފައި ވަނީ ތަނުގެ ގުދުރަތީ ރީތިކަން ގެއްލިއްޖެ ކަމަށް ބުނެއެވެ.

ކައުންސިލުން ކުރި ޓްވީޓްގެ ފޮޓޯތަކަށް އިޝާރާތްކުރައްވައި އާޓްސް މިނިސްޓަރު ޔުމްނާ މައުމޫން ވިދާޅުވީ، އާންމުން ޕާކުތަކަށް ޒިޔާރަތްކުރަނީ ތަނުގެ ގުދުރަތީ ރީތިކަން ދެކިލުމަށް ކަމަށާއި، އެންމެ ރަނގަޅު ގޮތަކީ ގުދުރަތީ ފެހިކަމުގައި އެ ތަން ބޭއްވުން ކަމަށެވެ.

ބައެއް އެހެން މީހުން ވަނީ ކައުންސިލުން ލޮނުޒިޔާރަތް ޕާކަށް މި ބަދަލު ގެނައީ ކީއްވެތޯ ސުވާލު އުފައްދައިފައެވެ.

ލޮނުޒިޔާރަތް ޕާކު ކުރިން ހުރި ގޮތަށް ރުޖޫއަކުރުމަށް ގޮވާލައި ބައެއް އިތުރު މީހުން ބުނި ގޮތުގައި، ކުރިން އެ ތަން އޮތް ގޮތް ރަނގަޅެވެ.

ޓްވިޓާގައި ހިޔާލު ފާޅުކުރި އެހެން މީހަކު ބުނި ގޮތުގައި، މިއީ ފައިސާ އިން ކުރި ބޭކާރު ހަރަދެކެވެ.

"އަހަރެން ބުނަން އޮތީ ކުރިން މި ތަން (ލޮނުޒިޔާރަތް ޕާކު) އޮތް ގޮތް ރަނގަޅޭ. [މި ބަދަލު] ގުދުރަތީ އެއް ނޫން، އަދި ދިވެހިވަންތަ އެއް ވެސް ނޫން. މިއަށް ވުރެ ގަޑިއެއް ބެހެއްޓުން ވެސް ރަނގަޅު." ޓްވިޓާގައި މީހަކު ބުންޏެވެ.

"މުޅި ތަން ހަރާބު."

މިކަމާ ގުޅިގެން ކައުންސިލްގެ ބަހެއް ލިބޭގޮތް ވަނީ ނުވެފައެވެ.

16.8 މިލިއަން ރުފިޔާ ހަރަދުކޮށްގެން ސިނަމާލެ ބްރިޖް ކައިރީގައި ތަރައްގީކޮށްފައިވާ ލޮނުޒިޔާރަތް ޕާކަކީ އާންމުންގެ މެދުގައި އެންމެ މަގްބޫލު އެއް ތަނެވެ. ކައިވެނި ހަފްލާތަކުގެ އިތުރުން އެހެނިހެން މުނާސަބާ ވެސް އެ ތަނުގައި ފާހަގަކުރެއެވެ.

ހަބަރު މާލެ ސިޓީ ކައުންސިލް ލޮނުޒިޔާރަތް ޕާކް