އަލިފާނުގެ ހާދިސާ އެއް ހިނގައި މާލޭގެ ގެއެއްގެ އެޕާޓްމަންޓަކަށް ބޮޑެތި ގެއްލުންތަކެއް ލިބިއްޖެއެވެ.
އެމްއެންޑީއެފުން މީޑިއާ އާ ހިއްސާކުރި ފޮޓޯތަކުން ފެންނަ ގޮތުގައި، އެ ގޭގެ ފާހާނާ އާއި ކޮޓަރި ވެސް ވަނީ ބޭނުންނުކުރެވޭ ވަރަށް އަނދައިފައެވެ.
މީޑިއާ އަށް ދިން މައުލޫމާތުގައި އެމްއެންޑީއެފުން ބުނީ، ހެންވޭރު ހިރިޔާ ނަމަކަށް ކިޔާ ގެއެއްގެ ތިންވަނަ ފަންގިފިލާގައި ހުރި ތިން ކޮޓަރީގެ އެޕާޓްމަންޓެއްގައި އަލިފާން ރޯވި ކަމުގެ މައުލޫމާތު ލިބިފައި ވަނީ ފަތިހު 4 ޖަހަން ކައިރިވެފައި ވަނިކޮށް ކަމަށާއި، އަލިފާންގަނޑު ނިއްވާލެވުނީ 4:25 ހާއިރު ކަމަށެވެ.
އެ ހާދިސާގައި އެއްވެސް މީހަކަށް ގެއްލުމެއް ނުވާ ކަމަށް އެމްއެންޑީއެފުން ބުންޏެވެ.
އެންޑީއެމްއޭ އިން ބުނީ، އެ ހާދިސާގައި ގެއްލުން ލިބުނު އެޕާޓްމަންޓުގައި ދިރިއުޅެމުން ދިޔަ ހަ މީހުންގެ އާއިލާގެ ހާލު ރަނގަޅު ކަމަށާއި، އެ އާއިލާ ވަގުތީ ހިޔާއަކަށް ބަދަލުކޮށްފައިވާ ކަމަށެވެ.
އެ އިދާރާ އިން ބުނި ގޮތުގައި، އެ އެޕާޓްމަންޓުގެ އެސެސްމަންޓެއް ހެދުމުގެ މަސައްކަތްތައް މިހާރު ކުރަމުންދާ ކަމަށާއި، އަލިފާނުގެ ހާދިސާ ހިނގަން މެދުވެރިވި ސަބަބު ހޯދުމުގެ މަސައްކަތް ފުލުހުންނާއި ސިފައިން ކުރަމުންދާ ކަމަށެވެ.
