ޗައިނާގެ ރައީސް ޝި ޖިންގްޕިން ސައުދީ އަށް މިހާރު ކުރައްވަމުން ގެންދަވާ 3 ދުވަހު ރަސްމީ ދަތުރުގައި 29 ބިލިއަން ޑޮލަރުގެ އެއްބަސްވުމެއްގައި ސިއި ކުރައްވާނެ ކަމަށް ސައުދީ އިދާރާތަކުން ބުނެފިއެވެ.
ޗައިނާގެ ރައީސްގެ ދަތުރާ ގުޅިގެން އެމެރިކާގެ ނުތަނަވަސްކަން ބޮޑުވެފައިވާ އިރު، ސައުދީން ބުނީ ދެގައުމުގެ ދެމެދުގައި ހަކަތައިގެ ދާއިރާއިން ކުރިއަށް ދާން އެއްބަސްވާނެ ކަމަށާއި، ޗައިނާ އަކީ މުހިންމު ބައިވެރިއެއް ކަމަށެވެ.
ޗައިނާއަކީ ދުނިޔޭގެ އެންމެ ބޮޑު އެނާޖީ ކޮންސިއުމާ ނުވަތަ ހަކަތަ ބޭނުން ކުރާ ގައުމެވެ. ސައުދީ އަކީ ދުނިޔޭގެ އެންމެ ބޮޑު އޮއިލް އެކްސްޕޮޓާ ނުވަތަ ތެޔޮ އުފައްދާ ގައުމެވެ. މި ދެގައުމުގެ ދެމެދުގައި ކުރެވޭ މުއާމަލާތްތަކަކީ އެމެރިކާއަށް ބަލައިގަންނަން ފަސޭހަ މުއާމަލާތްތަކަށް ނުވާ އިރު، ޝީގެ ދަތުރާ ގުޅިގެން އެމެރިކާއިން ބުނެފައި ވަނީ، ގާތުން ބަލަމުން ދާ ކަމަށާއި މެދުއިރުމަތީގައި ޗައިނާގެ ޝާމިލުވުން ބޮޑު ކުރަން މަސައްކަތް ކުރާތަން ފެންނަ ކަމަށެވެ. ނަމަވެސް އެމެރިކާގެ ފޯކަސް ހުރީ، ސައުދީ އާއި އެމެރިކާ އާ ދެމެދު އޮތް އެއްބަސްވުންތަކާ އެކު ކުރިއަށް ދާން ކަމަށްވެސް ބުނެއެވެ.
މާދަމާގެ ނިޔަލަށް ޝީ، ސައުދީގައި ހުންނަވާ އިރު މައިގަނޑު 2 ސަމިޓެއްގައި ބައިވެރިވެ ވަޑައިގަންނަވާނެއެވެ. އެއް ސަމިޓަކީ ސަލްމާން ރަސްގެފާނު ރިޔާސަތު ބަލަހައްޓަވާ އަދި ވަލީއަހުދު މުހައްމަދު ބިން ސަލްމާން އާއި ދެގައުމުގެ އިސްވެރިންގެ މެދުގައި ބާއްވާ "ޗައިނީސް-ސައުދީ ސަމިޓް" އެވެ. ދެވަނަ ސަމިޓަކީ އަރަބި 14 ގައުމެއްގެ ވެރިން ބައިވެރިވެ ވަޑައިގަންނަވާ ޑިވެލޮޕްމަންޓް ސަމިޓެކެވެ. މި ސަމިޓުގައި އިގުތިސޯދީ ދާއިރާއިންނާއި ތަރައްގީގެ ދާއިރާއިން ގައުމުތަކުގެ މެދުގައި މަޝްވަރާ ކުރާނެ ކަމަށް ސައުދީގެ ރަސްމީ ނޫސް އިދާރާ (ސައުދީ ޕްރެސް އެޖެންސީ) އިން ބުނެއެވެ.
ޝީ ގެ މި ދަތުރާ ގުޅެ ތަފްސީލުތައް މާ ބޮޑަށް ހާމަ ކޮށްފައި ނުވާ އިރު މި ދަތުރު ކުރައްވާކަން ވެސް މީގެ ކުރިން ރަސްމީކޮށް އާންމުކޮށް އިއުލާން ކޮށްފައެއް ނުވެއެވެ.
ޗައިނާގެ ރައީސް ސައުދީއަށް މި ވަޑައިގަތީ، މެދުއިރުމަތީގައި އެމެރިކާގެ އެންމެ ބޮޑު ބައިވެރިޔާ، ސައުދީ އާ މެދު ނުރުހިފައި އޮތް ދަނޑިވަޅެއްގައެވެ. އެމެރިކާއިން ރުޅި އައީ، ރަޝިއާއިން ޔޫކްރައިން އަށް އަރާ ކުރަން ފެށި ހަނގުރާމަ އާ އެކު، ރަޝިއާއިން ޔޫރަޕަށް ތެލާއި ގޭސް ފޮނުވުން ހުއްޓާލި ދަނޑިވަޅުގައި، އޯޕެކް+ އިން ތެޔޮ އުފައްދާ މިންވަރު، ހުސްވި އޮކްޓޯބަރު މަހު ކޮށްޓްރޯލް ކުރުމުންނެވެ. އަދި އެކަމާ ގުޅިގެން ސައުދީ އާ އެކު އޮންނަ ގުޅުން މުރާޖައާ ކުރާނެ ކަމަށް ބުނެ އެމެރިކާއިން އިންޒާރުވެސް ދިނެވެ.
ޝީ، ސައުދީއަށް ވަޑައިގެންނެވި އިރު ޗައިނާގައި ކޮވިޑް ޒީރޯ ސިޔާސަތާ ހެދި އާންމުންގެ ކެތްތެރިކަން ކޮޅުންލައި މަގުތަކަށް ނުކުމެ މުޒާހަރާ ކުރަމުންވެސް ދެއެވެ. މި ފާއިތުވި ހަފްތާގައި އެ ސިޔާސަތަށް ކުޑަ ލުޔެއް ދިން ނަމަވެސް ޒީރޯ ސިޔާސަތު ދެމި އެބަ އޮތެވެ. މިވަގުތަށް ދިން ލުޔަކީ، ގޭގޭގައި ތިބޭ މީހުން ޕީސީއާރު ހަދަން ނުޖެހުމާއި، މަސައްކަތަށް އޮފީސް ވެހިކަލް ތަކުގައި ދަތުރު ކުރާ މީހުންނަށް އިރުއިރު ކޮޅާ ޕީސީއާރު ހަދަން ނުޖެހުން ފަދަ ލުއިތަކެކެވެ.
