32.50 މިލިއަނަށް އެމްޓީސީސީއާ ހަވާލުކުރި އދ. ހަންޏާމީދޫ ބަނދަރުގެ މަސައްކަތް ނިންމައިފިއެވެ.
ހަންޏާމީދޫ ބަނދަރުގެ މަސައްކަތަކީ ޕްލޭނިން މިނިސްޓްރީއިން އެމްޓީސީސީއާ ހަވާލުކޮށްގެން ކުރިއަށްގެންދިޔަ މަޝްރޫއެކެވެ.
އެ މަޝްރޫއުގެ ދަށުން 6363 ކިއުބިކް މީޓަރުގެ ސަރަހައްދެއްގެ ބަނދަރު ފުންކޮށްފައިވާއިރު 204 މީޓަރުގެ ސަރަހައްދެއްގައި ބޭރުތޮށިލާ، 276 މީޓަރުގެ ސަރަޙައްދެއްގައި އެއްގަމުތޮށި ވަނީ ލާފައެވެ.
މީގެއިތުރުން 160 މީޓަރުގެ ސަރަހައްދެއްގައި ރިވެޓްމެންޓް ޖަހާ، 1,330 އަކަ މީޓަރުގެ ސަރަހައްދެއްގައި ހާބަ ޕޭވްމަންޓް ހަދާ ރޭމްޕެއް ހެދާފައިވާއިރު ޖެޓީއެއް ހެދުމާއި މޫރިން ބޮއެ އާއި ބަނދަރު ބައްތި ހަރުކުރުމުގެ މަސައްކަތް ވަނީ ކޮށްފައެވެ.
736 މީހުންގެ އާބާދީގެ އދ. ހަންޏާމީދޫއަކީ މިހާރުވެސް 12 ގެސްޓްހައުސްއާއެކު 100 އަށްވުރެ ގިނަ އެނދު ހުރި ރަށެކެވެ. އަދި ގެސްޓްހައުސް ވިޔަފާރިއާއިއެކު ޑައިވިން ދޯނިފަހަރާއި ލޯންޗް އަދި ޑިންގީތައް އިތުރުވެފައިވާއިރު ކުރީގައި އޮތް ބަނދަރުގެ ބަދަލުގައި ޒަމާނީ ރީތި ބަނދަރެއް މިއަދު ލިބިގެން ދިޔުމަކީ ރައްޔިތުންނަށް އެތައް ލުއިފަސޭހައެއް ކަމަށް އެމްޓީސީސީއިން ފާހަގަކުރެއެވެ.
ވޭތުވެދިޔަ 41 އަހަރުތެރޭ އެމްޓީސީސީން ވަނީ ރާއްޖޭގެ އެކި ކަންކޮޅުތަކުގައި ގިނަ މަޝްރޫއުތަކެއް ނިންމާފައެވެ. 1980 ވަނަ އަހަރު އެމްޓީސީސީ އުފެދުނީ ރާއްޖޭގެ ތަރައްގީގެ ދަތުރުގެ މުހިއްމު މަރުހަލާއެއްގައެވެ.
