އިނގިރޭސިވިލާތުގެ ބޮޑުވަޒީރު ރިޝީ ސޫނަކުގެ ޒައާމަތުގައި ރާއްޖެ އާއި އެ ގައުމާ ދެމެެދު އޮތް ގުޅުން އިތުރަށް ބަދަހިކުރެވޭނެ ކަމަށް އުންމީދުކުރައްވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ރައީސް މިހެން ވިދާޅުވީ، އިނގިރޭސިވިލާތުގެ އާ ބޮޑުވަޒީރު ރިޝީ ސޫނަކަށް މަރުހަބާ ދަންނަވާ ކުރެއްވި ޓްވީޓެއްގައެވެ.
ރައީސް ވަނީ އިނގިރޭސިވިލާތަށް ހެޔޮ ބަދަލުތައް ގެންނެވުމަށް ސޫނަކް ގެންގުޅުއްވާ ތަސައްވުރު ހަގީގަތަކަށް ވެގެން ދިއުމުގައި ކާމިޔާބީއަށް އެދިވަޑައިގެންފައެވެ.
މީގެ އިތުރުން ދެ ގައުމަށް މުހިއްމު މައްސަލަތަކުގައި ބައިނަލްއަގުވާމީ މައިދާނުގައި ގުޅިގެން މަސައްކަތް ކުރުމަށް ވެސް އުއްމީދު ކުރައްވާ ކަމަށް ރައީސް ވިދާޅުވިއެވެ.
އިނިގިރޭސި ކުރީގެ ބޮޑުވަޒީރު ލިޒް ޓްރަސްގެ އިސްތިއުފާއާ އެކު ބޮޑުވަޒީރު ކަމުގެ ރޭހަށް ނުކުމެވަޑައިގަތީ ސޫނަކާއި ޕެނީ މޯޑާންޓް އާއި ބޮރިސް ޖޯންސަންއެވެ. ނަމަވެސް ޖޯންސަންގެ މައްޗަށް ޕެނީ އާއި ސޫނަކް ކުރި ހޯއްދެވުމުން ދެން ވާދަ ކުރައްވަމުން ގެންދެވީ އެ ދެބޭފުޅުންނެވެ. ދެބޭފުޅުންވެސް ރޭގެ ނިޔަލަށް މަދުވެގެން 100 އެޕާޓީގެ އެމްޕީންގެ ތާއީދު ހޯއްދަވަން ޖެހިވަޑައިގަނެއެވެ.
ސޫނަކް ބޮޑުވަޒީރުކަން ޔަގީން ކުރެއްވީ 193 އެމްޕީންގެ ތާއީދާ އެކުގައެވެ. ޕެނީ އަށް ލިބިވަޑައިގަތީ 26 އެމްޕީންގެ ތާއީދެވެ.
ސޫނަކަކީ ފާއިތުވި 200 އަަހަރުގެ ތެރޭގައި އިނގިރޭސި ބޮޑުވަޒީރު ކަމާ ހަވާލުވެ ވަޑައިގަންނަވާ އެންމެ ހަގު ބޭފުޅާއެވެ. މިހާރު އޭނާގެ އުމުރަކީ 42 އަހަރެވެ.
ސޫނަކް ވަނީ އިނގިރޭސި ގާނޫނު ހަދާ މަޖިލިހުގައި 2015 ވަނަ އަހަރު މަސައްކަތް ކުރައްވާ، އޭގެ ފަހުން ކުރީގެ ބޮޑުވަަޒީރު ތެރީސާ މޭގެ ސަރުކާރުގައި ޖޫނިއާ މިނިސްޓަރެއްގެ މަގާމު ފުރުއްވާފައެވެ. ސޫނަކް ވަނީ ބޮރިސް ޖޯންސަންގެ ބޮޑުވަޒީރު ކަމުގައި 2019 ވަނަ އަހަރު ޗީފް ސެކްރެޓަރީ ޓު ދަ ޓްރެޝަރީގެ މަގާމު ފުރުއްވުމުގެ އިތުރުން ޗާންސެލާ ނުވަތަ ފިނޭންސް މިނިސްޓަރުގެ މަގާމު 2020 ވަނަ އަހަރު ކުރައްވާފަވެ.
