ކިތަންމެ ކުޑަ އާމްދަނީއެއް ލިބޭ ވަޒީފާއެއްވިޔަސް އަދާކުރައްވާ އަމިއްލަ ފުދުންތެރިކަމުގެ ހިތްހަމަޖެހުން ހޯދޭތޯ މަސައްކަތް ކުރުމަށް ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ރައީސް މިހެން ވިދާޅުވީ، މިއަހަރުގެ ގައުމީ ޒުވާނުންގެ ދުވަސް ފާހަގަކުރުމަށާއި ޒުވާނުންގެ އިނާމް ދިނުމަށް ރޭ، ސޯޝަލް ސެންޓަރުގެ އިންޑޯ ހޯލުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ، ވަޒީފާއެއް ނެތި ހުރުމުން ލިބޭ ނުތަނަވަސްކަން ދޫކޮށްލުން މުހިންމު ކަމަށާއި ކިތަންމެ ކުޑަ އާމްދަނީއެއް ލިބޭ ވަޒީފާއަކުން ވިޔަސް، އަމިއްލަ ފުދުންތެރިކަމުގެ ހިތްހަމަޖެހުން ހޯދޭތޯ ބަލަން ޖެހޭ ކަމަށެވެ.
އެއީ ޒުވާނުންނަށް ވެސް، އަދި މުޅި މުޖުތަމައަށްވެސް ލިބޭނެ ވަރަށް ބޮޑު ފައިދާއަކަށް ވާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ، އެކަމުން މުޖުތަމައަށް ކުރާނެ އެންމެ ބޮޑު ފައިދާއަކީ، މިހާރު ހުރި ވަރަށް ގިނަ އިޖުތިމާއީ މައްސަލަތަކަށް ކޮންމެވެސް ވަރެއްގެ ހައްލެއް ލިބު ކަމަށެވެ. އެއީ، މުޖުތަމައުން ޒުވާނުން އެކަހެރިވުން ހުއްޓުވައިދޭނެ ކަމެއް ކަމަށާއި އަދި ކުށުގެ ވެށްޓާ ދުރުކޮށްދޭނެ ކަމެއް ކަމަށް ރައީސް ފާހަގަކުރެއްވިއެވެ.
ރައީސް ވިދާޅުވީ، އެންމެ މުހިންމު ކަމަކީ، އަނެކުންގެ މާލީ އެހީތެރިކަމަށް ބަރޯސާވާންޖެހޭ މިންވަރު ކުޑަވުން ކަމަށެވެ.
ރައީސް ވާހަކަފުޅުގައި ޒުވާނުންނަކީ، ނަފްސާނީ ދުޅަހެޔޮ ބަޔަކަށް ހެދުމަށްޓަކައި ސަރުކާރުން ކުރައްވަމުން ގެންދަވާ މަސައްކަތްތަކުގެ މައްޗަށް ވެސް ވަނީ އަލިއަޅުއްވާލައްވާފައެވެ.
