ވެލާނާ އިންޓަނޭޝަނަލް އެއާޕޯޓުން ޗުއްޓީ ސީޒަނަށް ތައްޔާރު ވުމުގެ ގޮތުން ވަޒީފާއަށް ބިދޭސީން ހޯދުމުގެ މަސައްކަތް ފަށައިފިއެވެ.

އެމްއޭސީއެލްގެ ކޯޕަރޭޓް ކޮމިއުނިކޭޝަންސް ގެ ޖެނެރަލް މެނޭޖަރު ހަސަން އަރީފު ވިދާޅުވީ، އެއާޕޯޓުގެ ޕީކް ސީޒަންގައި އަބަދުވެސް އިތުރު މުވައްޒަފުން ނަގާ ކަމަށާއި، މިހާރުވެސް އިތުރު މުވައްޒަފުން ނަގަން އުޅެނީ އެސަބަބާ ހުރެ ކަމަށެވެ.

އަދި ހަމައެކަނި ބިދޭސީން ނަގަނީ ނޫން ކަމަށާއި ދިވެހިންވެސް ނަގާ އިރު ބިދޭސީންވެސް ނަގަނީ، ބޯޓު ތަކުން ގެންނަ ދާގީނާ އާއި ލަގެޖް ހޭންޑްލިން އަށް ކަމަށާއި ސީޒަން އަންނަ އިރު ބާރު ބޮޑުވުމުން އިތުރު މުވައްޒަފުން ނުނަގާ ނުވާތީ ކަމަށްވެސް އޭނާ ވިދާޅުވިއެވެ.

"އެއީ ސީޒަނަލް ކޮށް ނަގާ ބަޔެއް، ސީޒަން އަށް ތައްޔާރު ވުމުގެ ގޮތުން އޮޕަރޭޝަނަލް ދާއިރާތަކަށް ދިވެހިންވެސް ނަގާފަ، ބެރު މީހުން ކޮޅެއްވެސް ނަގަނީ، އެއީ ސީޒަންގައި ބާރު ބޮޑުވާނެތީ"
އަރީފް

އަރީފް ވިދާޅުވީ، އެއާޕޯޓުގެ ވަޒީފާތަކަށް ބޭރު މީހުން ނަގާ ކަމަށް ވާހަކަ ދައްކާ އިރު، މިހާރުވެސް އެއާޕޯޓުގެ 97 ޕަސެންޓަކީ ދިވެހި މުވައްޒަފުން ކަމަށާއި، ބާކީ 3 ޕަސެންޓް ބޭރު މީހުންގެ ތެރެއިން ސީޒަންކޮށް ނަގާ މީހުން ދިޔައިމާ އެބައިވެސް މަދުވާނެ ކަމަށެވެ.

އެމްއޭސީއެލް އިން ހިންގާ ވެލާނާ އެއާޕޯޓަކީ 24 ގަޑިއިރު ކަހަލަ ގޮތަކަށް ފްލައިޓް ޖައްސާ ނަގާ، ހަރަކާތްތައް އަބަދުވެސް ހިނގާ ތަނަކަށް ވާއިރު އެތަނުގައި ޓެކްނިކަލް ދާއިރާތަކާއި މެނޭޖްމަންޓް ދާއިރާގެ އިތުރުން ޑިއުޓީ ފްރީ ބައެއް ފިހާރަތަކުގައި ބޭރު މީހުން ވަޒީފާ އަދާ ކުރެއެވެ.

ސީޒަން އާ ދިމާކޮށް މުވައްޒަފުން ނަގާ އިރު އެއީ ކިހާ މުވައްޒަފުންނެއް ކަމެއް އެމްއޭސީއެލްއަކުން ހާމައެއް ނުކުރެއެވެ. ނަމަވެސް އަރީފް ވިދާޅުވީ، އެ ވަގުތަކު ބޭނުން ޖެހޭ މިންވަރަށް ބަލައިގެން އަބަދުވެސް ވަޒީފާއަށް މީހުން ނަގާ ކަމަށެވެ.

އެއާޕޯޓުގެ އާ ރަންވޭ ހުޅުވާ ހިދުމަތް ދޭން ފެށުމުން އެއާ ޓްރެފިކް މޫވްމަންޓް އިތުރުވެ އަވަސް ވާނެ ކަމަށް ބެލެވޭ އިރު، ހިދުމަތް ލަސްވުމުގެ ޝަކުވާ މިހާރުވެސް ވަރަށް ބޮޑެވެ. އެގޮތުން އެންމެ ޝަކުވާ ބޮޑީ، ފްލައިޓް ޖައްސާ އެތައް އިރެއް ވާ އިރުވެސް ލަގޭޖް ނުލިބި ހުންނަން ޖެހޭ މައްސަލައިގައި ކަމަށް ވާއިރު އަލަށް މި ނަގާ ބިދޭސީންނާ އެކު މަސައްކަތަށް އަންނާނެ ބަދަލެއް ސާފެއް ނުވެއެވެ.

އެމްއޭސީއެލްގައި މިހާރުވެސް 3500 މުވައްޒަފުން އުޅެއެވެ.

ހަބަރު ވެލާނާ އެއާޕޯޓް