ފާއިތުވި ފަސް އަހަރުގެ ތެރޭ އިންތިހާބީ ކުށެއް ކުރިކަން ސާބިތުވެއްޖެ ނަމަ، އެ މީހަކަށް އިންތިހާބުތަކުގައި ހަރަކާތްތެރިވުމުގެ ހުއްދަ ނުދިނުމުގެ ބާރު އިލެކްޝަންސް ކޮމިޝަނަށް ލިބޭ ގޮތަށް ހަދައިފިއެވެ.
އިންތިހާބުތަކާ ބެހޭ އާންމު ގާނޫނުގައިވާ ގޮތުން، ކެންޑިޑޭޓުންގެ ފަރާތުން މަންދޫބުންނާއި އޮބްޒާވަރުންނާއި މޮނިތަރުން ވޯޓުލާ މަރުކަޒުތަކުގައި ހަރަކާތްތެރިވުމުގެ ފުރުސަތު އިލެކްޝްންސް ކޮމިޝަނުން ފަހިކޮށްދޭން ޖެހެއެވެ.
އެ ގާނޫނުގެ ދަށުން، އެފަދަ މީހެއްގެ ކިބައިގައި ހުންނަން ވާނެ ޝަރުތުތަކުގެ ތެރޭގައި ހިމެނެނީ:
- އުމުރުން 18 އަހަރު ވެފައިވުން
- ޖިނާއީ ކުށެއްގެ ހުކުމް ތަންފީޒު ކުރެވެމުން ނުދިއުން
- އިންތިހާބަކާ ބެހޭ މަސައްކަތެއް ކުރުމަށް ކޮމިޝަނުގެ ފަރާތުން ހަވާލުވެފައިވާ މީހަކަށް ނުވުން
- ފަނޑިޔާރަކަށް / މިނިވަން މުއައްސަސާއެެއްގެ މެންބަރަކަށް ނުވުން
- ފުލުހަކަށް / ސިފައިންގެ މީހަކަށް ނުވުން
- ބަންދުގައި ހުރި މީހަކަށް ނުވުން
- އިންތިހާބީ މަގާމަކަށް ކުރިމަތިލާފައިވާ މީހަކަށް ނުވުން
އޭގެ އިތުރުން، މިދިޔަ ބުރާސްފަތި ދުވަހު އިލެކްޝަންސް ކޮމިޝަނުން ވަނީ އިންތިހާބުތަކާ ބެހޭ އާންމު ގާނޫނަށް މާއްދާ އެއް އިތުރުކޮށްފައެވެ. އެގޮތުން އެ ގަވައިދުގެ 29 ވަނަ މާއްދާ އަށް އިތުރުކުރި އަކުރުގައިވާ ގޮތުން، މަތީގައިވާ ޝަރުތުތައް ފުރިހަމަވި ކަމުގައި ވިޔަސް، ވޭތުވެދިޔަ ފަސް އަހަރު ދުވަހުގެ ތެރޭ އިންތިހާބީ ކުށެއް ކުރި ކަމަށް ސާބިތުވެއްޖެ ނަމަ، އެ މީހަކަށް އިންތިހާބުތަކުގައި ހަރަކާތްތެރިވުމުގެ ހުއްދަ ދޫނުކުރުމުގެ އިހްތިޔާރު އީސީ އަށް ލިބިގެންވެއެވެ.
އިންތިހާބުތަކުގައި ވޯޓުލާ މަރުކަޒުތަކުގައި ހަރަކާތްތެރިވާ މަންދޫބުންނާއި އޮބްޒާވަރުން ކުރުން މަނާ ކަންކަމުގެ ތެރޭގައި މައިގަނޑު ގޮތެއްގައި ހިމެނެނީ ވޯޓުލަމުންދާ ގަޑީގައި ކެންޑިޑޭޓަކަށް ތާއީދު ހޯދުމަށް މަސައްކަތްކުރުމެވެ.
