ދިވެހިން މިހާރު އުޅެމުން އަންނަނީ ފުރިހަމަ މިނިވަންކަމާއި ހައްގުތައް ލިބިގެން ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ޝަރަފްވެރިކަމުގެ ގައުމީ އިނާމާއި ހިތްވަރު ދިނުމުގެ ގައުމީ އިނާމު ދެއްވުމަށް މިރޭ ދަރުބާރުގޭގައި ބޭއްވި ޖަލްސާ ޝަރަފުވެރިކޮށްދެއްވާ ވާހަކަފުޅު ދައްކަވަމުން ރައީސް ވިދާޅުވީ، އަޅުގަނޑުމެންގެ މެދުގައި ގައުމީވަންތަކަމާއި ގައުމިއްޔަތުގެ ރޫހު ދެމެހެއްޓުމަކީ ކޮންމެ މީހެއްގެ ޒިންމާއެއް ކަމަށެވެ.
އެންމެން މިއަދު އުޅެމުން މިއަންނަނީ ފުރިހަމަ މިނިވަންކަމާއި ހައްގުތައް ވެސް ލިބިގެން ކަމަށާއި ހުޅުވައިލެވިފައިވާ ޑިމޮކްރެޓިކް ޖައްވެއްގައިި ކަމަށް ރައީސް ވިދާޅުވިއެވެ.
ރައީސް ވިދާޅުވީ، ޑިމޮކްރެސީއެއް ދެމެހެއްޓުމުގައި ވެސް އެންމެ މުހިންމު ކަމަކީ، ގަނޫނީ އިމުގެ ތެރެއިން ކަންކަން ކުރުން ކަމަށާއި އެއްބަސްވެވިފައި ހުރި ހަމަތަކާއި އުސޫލުތަކާއި ކަންކަމަށް އެންމެން ތަބާވުން ކަމަށެވެ.
ގާނޫނުތަކާއި ގަވައިދުތައް ހެދިފައި ހުންނަނީ އެންމެހާ ފަރުދުންގެ ހައްގުތައް ރައްކާތެރިކުރުމަށާއި މުޖްތަމައުގެ ހަމަޖެހުމަށާއި މުޅި ގައުމުގެ ސުލްހަ މަސަލަސްކަން ދެމެހެއްޓުމަށް ކަމަށް ރައީސް ވިދާޅުވިއެވެ.
ރައީސް ވަނީ ކޮންމެ މީހަކީ ވެސް ގާނޫނަށް ހުރުމަތްތެރިކޮށް ހިތައި، މުޖްތަމައުގެ މަސްލަހަތަށް އިސްކަންދޭ މީހަކަށް ވުމަށް އިލްތިމާސްކުރައްވާފައެވެ. އޭރުން އަޅުގަނޑުމެންނަކީ ފަހުރުވެރި ގައުމިއްޔަތެއްގެ މަތީގައި ސާބިތުވެ ތިބި ބަޔަކަށް ވެގެންދާނެ ކަމަށް ރައީސް ފާހަގަކުރެއްވިއެވެ.
