ފ. މަގޫދޫގައި ތަރައްގީކުރާ އެއާޕޯޓުގެ މަސައްކަތް އެމްޓީސީސީއާ ހަވާލުކޮށްފިއެވެ.
މަގޫދޫ އެއާޕޯޓް ތަރައްގީކުރުމުގެ މަސައްކަތް ހަވާލުކުރުމުގެ އެއްބަސްވުމުގައި ޕްލޭނިން މިނިސްޓްރީގެ ފަރާތުން ސޮއިކުރެއްވީ، އެ މިނިސްޓްރީގެ ޑިރެކްޓާ ޖެނެރަލް ޝާނާ ފާރޫގެއެވެ. އަދި އެމްޓީސީސީގެ ފަރާތުން ސޮއިކުރެއްވީ އެކުންފުނީގެ ސީއީއޯ އާދަމް އާޒިމެވެ.
މި މަޝްރޫއުގެ ދަށުން 1500 މީޓަރު ދިގު 30 މީޓަރު ފުޅާ ރަންބޭއެއް ހެދުމާއި، ޕަސެންޖާ ޓާމިނަލް އިމާރާތެއް ހެދުމާއި، ފަޔާ ސްޓޭޝަން ހެދުމާއި، ސަލާމަތީ ވަސީލަތްތައް ގާއިމު ކުރުން ހިމެނެއެވެ.
މީގެ އިތުރުން ނެވިގޭޝަން އިކުއިޕްމަންޓް ސަޕްލައިކޮށް އިންސްޓޯލް ކުރުމާއި މެޓް އިކްއިޕްމަންޓް ސަޕްލައިކޮށް އިންސްޓޯލްކުރުން އަދި ގްރައުންޑް ހޭންޑްލިން އިކްއިޕްމަންޓް ސަޕްލައިކޮށް އިންސްޓޯލް ކުރުން މި މަޝްރޫއުގެ ދަށުން ހިމެނެއެވެ.
މި މަޝްރޫއު އެމްޓީސީސީއަށް ހަވާލު ކޮށްފައިވަނީ 550 ދުވަހުގެ ތެރޭގައި ނިންމާ ގޮތަށެވެ.
އެމްޓީސީސީއާ މި މަޝްރޫއު ހަވާލުކޮށްފައިވަނީ ޑިޒައިން އެންޑް ބިލްޑް އުސޫލުން ކުރާގޮތަށެވެ. މި މަޝްރޫއުއަކީ 231.54 މިލިއަން ރުފިޔާގެ މަޝްރޫއެކެވެ.
މިއީ ފ. އަތޮޅުގައި ތަރައްގީ ކުރާ ފުރަތަމަ އެއާޕޯޓެވެ.
