ޑެންގޫ ޖެހިގެން އަނެއްކާވެސް ޒުވާނަކު މަރުވެއްޖެއެވެ.
އެނގިފައިވާ ގޮތުގައި މިއަދުގެ ވަގުތެއްގައި މަރުވެފައި ވަނީ އުނގޫފާރު ރީޖަނަލް ހޮސްޕިޓަލުގައި ފަރުވާދެމުން ދިޔަ އުމުރުން 21 އަހަރުގެ ރ. ކަނދޮޅުދޫ، ހަސަން އަތޫފް އަހުމަދެވެ.
ޑެންގޫއާއި ވައިރަލް ހުން ހަލުވި ކަމާއެކު ރާއްޖޭގައި މިދުވަސްކޮޅު ފެތުރެމުން އަންނައިރު މިއަދު މަރުވި ޒުވާނާގެ އިތުރުން މި މަހުގެ ތެރޭގައި ޑެންގޫ ޖެހި ކުޑަކުއްޖަކާއި އެކަކު ވަނީ މަރުވެފައެވެ. އޭގެ ތެރޭގައި ހިމެނެނީ ރ. ދުވާފަރު އުމުރުން 8 އަހަރުގެ ކުޑަކުއްޖަކާއި އއ. ތޮއްޑޫ 19 އަހަރުގެ ޒުވާނެކެވެ.
ދުވާފަރުން ޑެންގޫ ޖެހި ދެ މީހަކު މަރުވެފައި ވާއިރު އެ ރަށުގައި ހަލުވި ކަމާއެކު ޑެންގޫ ފެތުރެމުންދާ ކަމުގެ މައުލޫމާތުތައް ވަނީ ލިބިފައެވެ. އަދި އެކަމާ ގުޅޭ އިތުރު ތަފްސީލުތައް ހޯދަން މިހާތަނުން ކުރި މަސައްކަތް އަދި ވަނީ ކާމިޔާބުވާގޮތް ނުވެފައެވެ.
