ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު، ބަހްރައިންއަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން ދިވެހިރާއްޖެއާ ބަހްރައިންގެ ގުޅުން ބަދަހިކުރުމާގުޅޭ 4 އެއްބަސްވުމެއް މިއަދު ބަދަލުކޮށްފައެވެ.
މި އެއްބަސްވުންތައް ބަދަލު ކުރުމަށް ބަހްރައިންގެ އަލް ޤުޟައިބިއްޔާ ޕެލަސްގައި ބޭއްވި ރަސްމިއްޔާތުގައި، ރައީސް ސޯލިހާއި، ބަހަރައިންގެ ރަސްގެފާނު، ހަމަދު ބިން އީސާ އަލް ހަލީފާ ބައިވެރިވެވަޑައިގެންނެވި ކަމަށް ރައީސް އޮފީހުން ބުނެއެވެ.
ރައީސް އޮފީހުން ބުނީ، މިއަދު ބަދަލުކުރި އެއްބަސްވުންތަކުގެ ތެރޭގައި ހިމެނޭ "މެމޮރަންޑަމް އޮފް އަންޑަސްޓެންޑިން އޮން ޕޮލިޓިކަލް ކޮންސަލްޓޭޝަންސް" އަކީ، ބައިނަލްއަގްވާމީ ގުޅުންތަކާއި ގުޅޭ ގޮތުން ދެގައުމުގެ މެދުގައި ހިޔާލާއި މަޝްވަރާ ބަދަލު ކުރުމާއި ގުޅޭ އެއްބަސްވުމެއް ކަމަށެވެ.
މީގެ އިތުރުން ބަދަލު ކުރިއަނެއް އެއްބަސްވުމަކީ، "މެމޮރަންޑަމް އޮފް އަންޑަސްޓެންޑިން ފޯ ކޯޕަރޭޝަން އޮން ޑިޕްލޮމެޓިކް ޓްރެއިނިން އެންޑް އެކްސްޗޭންޖް އޮފް އިންފޮރމޭޝަން އެންޑް ޑޮކިއުމެންޓޭޝަން" ކަމަށް ރައީސް އޮފީހުން ބުނެއެވެ. މިއީ ބަހްރައިންގެ މުހައްމަދު ބިން މުބާރަކް އަލް ހަލީފާ އެކެޑަމީ ފޯ ޑިޕްލޮމެޓިކްސް ސްޓަޑީޒް އާއި ރާއްޖޭގެ ފޮރިން ސަރވިސް އިންސްޓިޓިއުޓާއި ދެމެދު ވި އެއްބަސްވުމެއް ކަމަށް ރައީސް އޮފީހުން ބުނެއެވެ.
ރައީސް އޮފީހުން ބުނީ ތިންވަނަ އެއްބަސްވުމަކީ، "މެމޮރަންޑަމް އޮފް އަންޑަސްޓެންޑިން އޮން ކޯޕަރޭޝަން އިން ދި އޭރިއާ އޮފް ޔޫތް އެންޑް ސްޕޯޓްސް ޑިވެލޮޕްމެންޓް" ކަމަށެވެ. މިއީ ޒުވާނުންނާއި ކުޅިވަރު ކުރިއެރުވުމުގެ ދާއިރާއިން ދެޤައުމުގެ މެދުގައި ގުޅުން ބަދަހިކުރުމުގެ އެއްބަސްވުމެއް ކަމަށް ރައީސް އޮފީހުން ވަނީ ފާހަގަކޮށްފައެވެ.
މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ، ޔޫތު މިނިސްޓަރު އަހްމަދު މަޚްހްލޫފެވެ. އެހެން އެއްބަސްވުންތަކުގައި ރާއްޖޭގެ ފަރާތުން ސޮއިކުރެއްވީ، ފްރިން މިނިސްޓަރު އަބްދުﷲ ޝާހިދެވެ.
މީގެ އިތުރުން މިއަދު ވަނީ، "މެމޮރަންޑަމް އޮފް އަންޑަސްޓެންޑިން އޮން ކްލައިމެޓް ޗޭންޖް"، މޫސުމީ ބަދަލުތަކާއި ގުޅޭ ގޮތުން ދެގައުމުން ގުޅިގެން މަސައްކަތް ކުރުމުގެ އެއްބަސްވުމެއް ވެސް ބަދަލު ކޮށްފައިވާ ކަމަށް ރައީސް އޮފީހުން ބުނެއެވެ.
މީގެ އިތުރުން، ރާއްޖެއާއި ބަހްރައިން އިން އިތުރު ދެ މެމޮރަންޑަމް އޮފް އަންޑަސްޓެންޑިން އެއްގައި ސޮއިކުރުމާ ގުޅޭގޮތުން ވަޒީރުންގެ މަޖިލީހުގައި މަޝްވަރާކުރައްވައި ކުރިޔަށް ގެންދަވާނެކަންވެސް މި ރަސްމިއްޔާތުގައި ވަނީ އިއުލާނު ކޮށްފައެވެ. އެއީ، ކަނޑާއި ވައިގެ މަގުން އަވަހަށް މުދާ ބަދަލުކުރުމާއި ގުޅޭ އެއްބަސްވުމަކާއި، ބަޙްރައިންގެ ޑޭޓާ ސެންޓަރުތަކުގައި ރައްކާކުރެވޭ މަޢުލޫމާތު ހިއްސާކުރުމާއި ގުޅޭ އެއްބަސްވުމެކެވެ.
މިއެއްބަސްވުންތައް ބަދަލު ކުރުމުގެ ކުރިން، ރައީސް ސޯލިހާއި، ބަހްރެއިންގެ ރަސްގެފާނު، ހަމަދު ބިން އީސާ އަލް ހަލީފާއާ ދެބޭފުޅުން ވަކިން ބޭއްވި ބައްދަލު ކުރެއްވުމުގައި ދެގައުމުގެ މެދުގައި އޮތް ގާތް ރަޙްމަތްތެރި ގުޅުން އިތުރަށް ބަދަހިކުރުމާއި ގުޅޭ ގޮތުންނާއި، ދެގައުމުގެ މަސްލަޙަތު ހުރި ކަންކަމުގައި ގުޅިގެން މަސައްކަތް ކުރެއްވުމާ ގުޅޭ ގޮތުން ހިޔާލު ބަދަލު ކުރައްވާ މަޝްވަރާ ކުރައްވާފައެވެ.
