ހއ. ހޯރަފުށީ މަގުތަކުގައި ތާރު އެޅުމުގެ އަމަލީ މަސައްކަތް ފަށާއިފިއެވެ.
މި މަސައްކަތް ފަށާފައިވަނީ އެކަމަށްޓަކައި މިއަދު ހޯރަފުށީގައި ބޭއްވި ހާއްސަ ރަސްމިއްޔާތުގައެވެ.
މިރަސްމިއްޔާތުގައި ޕްލޭނިން މިނިސްޓަރު މުހައަމްދު އަސްލަމްއާއި، ހޯރަފުށީ ދާއިރާގެ މަޖްލިސް މެންބަރު އަހްމަދު ސަލީމް އާއި ހޯރަފުށީ ކައުންސިލްގެ ރައީސް މުހައްމަދުވަހީދް އާއި، އެމްޓީސީސީގެ ޗީފް އެގްޒެކެޓިވް އޮފިސާ އާދަމް އާޒިމްގެ އިތުރުން އެމްޓީސީސީގެ އިސްވެރިން ބައިވެރިވެވަޑައިގެންނެވިއެވެ.
މި މަޝްރޫއުގެ ދަށުން، 25،909 އަކަ މީޓަރުގެ ސަރަޙައްދެއްގައި ސަބްބޭސް ހެދުމާއި، 25،909 އަކަ މީޓަރުގެ ސަރަޙައްދެއްގައި އޭބީސީ ފަށަލަ އެޅުން އަދި 25،909 އަކަ މީޓަރުގެ ސަރަހައްދެއްގައި 40 މިލިމީޓަރުގެ ތާރު އެޅުން ހިމެނެއެވެ.
މީގެ އިތުރުން މަގުމަތީ ނިޝާން ހަރުކުރުމާއި، 11،113.80 އަކަ މީޓަރުގެ ސަރަޙައްދެއްގައި ޕޭވްމަންޓް ހެދުމާއި، ސައިން ބޯޑު ހަރުކުރުން އަދި މަގު ބައްތި ހަރުކުރުމުގެ މަސައްކަތް ހިމެނެއެވެ.
ޕްލޭނިން މިނިސްޓްރީން އެމްޓީސީސީއާ ހަވާލުކުރި މި މަޝްރޫއަކީ 90.71 މިލިއަން ރުފިޔާގެ މަޝްރޫއެކެވެ.
