ބޮޑު ތިލަދުންމަތި ގުޅާލާ، ރާއްޖެ ޓްރާންސްޕޯޓް ލިންކް (އާރް.ޓީ.އެލް)ގެ ފެރީގެ ހިދުމަތް ބޮޑުތިލަދުންމަތީގައި ރަސްމީކޮށް އިފްތިތާހު ކޮށްފިއެވެ.
އެމްޓީސީސީން ބުނީ، މި މަޝްރޫއު ރަސްމީކޮށް އިފްތިތާހު ކޮށްދެއްވީ ރޭ އެކަމަށްޓަކައި ބޭއްވި ހާއްސަ ރަސްމިއްޔާތެއްގެ ތެރެއިން ރައީސުލްޖުމްހޫރިއްޔާ އިބްރާޙިމް މުހައްމަދު ސޯލިހު ކަމަށެވެ.
"އިންޓަގްރޭޓެޑް ނޭޝަނަލް ޕަބްލިކް ފެރީނެޓްވޯކް" މަޝްރޫއުގެ ފުރަތަމަ ފިޔަވަހި ސަރުކާރުން އެމްޓީސީސީއާ ހަވާލުކުރެއްވީ ޖެނުއަރީ 17 2021 ވަނަ ދުވަހު ކަމަށާއި، މި މަޝްރޫއުގެ ފޭސް 1 ގެ ދަށުން، ޒޯން 1 ގެ ހއ. ހދ. އަދި ށ. އަތޮޅަށް މިހާރު ރާއްޖެ ޓްރާންސްޕޯޓް ލިންކްސްޕީޑް ފެރީގެ ހިދުމަތް ދޭން ފަށާފައިވާ ކަމަށް އެމްޓީސީސީން ބުނެއެވެ.
އެމްޓީސީސީން ބުނީ، މި މަޝްރޫއުގެ ފޭސް 2 އަދި ފޭސް 3 އެއްގެ ދަށުން، ބާކީ 17 އަތޮޅަށް ހިދުމަތް ދޭންފެށި މުޅި ރާއްޖެ ކަނޑު ދަތުރުފަތުރުގެ ވިއުގައަކުން ގުޅާލެވިގެންދާނެ ކަމަށެވެ. މިއީ އަތޮޅުތަކުގެ ރައްޔިތުންނަށް އިގްތިސާދީ ގޮތުންނާއި އިޖުތިމާއީ ގޮތުން ފައިދާތަކެއް ކުރާނެ ހިދުމަތެއް ކަމަށް އެމްޓީސީސީން ވަނީ ބުނެފައެވެ.
ރޭ ބޮޑުތިލަދުންމަތީގައި އާރްޓީއެލް ރަސްމީކޮށް އިފްތިތާހް ކުރެވުމާއެކު ރައްޔިތުން ރަށު ބަންދުން ވީއްލި، ދަތުރުފަތުރުގެ އިންގިލާބީ އާ ބާބެއް ފެށުނީ ކަމަށް އެމްޓީސީސީން ފާހަގަކުރެއެވެ.
އެމްޓީސީސީން ބުނީ، ފުރަތަމަ ޒޯނުގާ ހިދުމަތް ފަށާފަ އި މި ވަނީ، ޒަމާނީ، ދުވެލި ހަލުއި، އުޅަނދު ތަކެއްގައި ކަމަށެވެ. މިގޮތުން ކުރިއަށްވުރެ އެތައް ގުނައެއް އަވަސްކޮށް ބާރު ދުވެލީގައި މިހާރު ދަތުރުތައް ކުރެވޭނެ ކަމަށް އެމްޓީސީސީން ބުނެއެވެ.
މިއީ، ރާއްޖޭގެ މޫސުމާ، އޮއިވަރާ، ބާންޏާ، ރާޅަށް ރިއާޔަތް ކުރެވިގެން، ދެ މޫސުމަށް ވެސް، ފަހިވާނޭހެން ބަނދެފައިވާ، ކަނޑަށްވެސްގަދަ، އުޅަނދު ތަކެއް ކަމަށާއި މި ފްލީޓްގައި ޒަމާނީ 13 ފެރީ މިވަގުތު އޮންނާނެ ކަމަށް އެމްޓީސީސީން ބުނެއެވެ. އެއީ މި ޒޯނުގެ 41 ރަށަށް ކޮންމެ ދުވަހަކުވެސް ހިދުމަތް ދެވޭ އުޅަނދުތަކެކެވެ.
އާރްޓީއެލް ސްޕީޑް ފެރީގެ ހިދުމަތް 6 ޒޯނުގައި ފެށިގެން ދާއިރު، ޒަމާނީ ފެރީގެ ހިދުމަތް ދޭ 82 އުޅަނދެއް އޮންނާނެ ކަމަށް އެމްޓީސީސީން ބުނެއެވެ.
އެމްޓީސީސީން ބުނީ، ކުރިއަށް އޮތް 9 މަސް ދުވަސްތެރޭ 9 އަތޮޅެއްގައި މިހިދުމަތް ތައާރަފު ކުރަން ކުރަންޖެހޭ މަސައްކަތްތައް މިހާރު ވެސް ކުރަމުންދާ ކަމަށެވެ. އަދި މުޅި ރާއްޖެއަށް މި ހިދުމަތް ފުޅާވެގެންދާއިރު އަށެއްކަ ސަތޭކަ ވަޒީފާ އަލަށް އުފެދިގެން ދާނެ ކަމަށް އެމްޓީސީސީން ބުނެއެވެ.
