ގެއްލިގެން ހޯދަމުންދާ ކ. މާލެ، ހ. ބޮނޑިކަނދޮޅުގެ، އުމުރުން 27 އަހަރުގެ މުހައްމަދު އަޒުހާން އެންމެ ފަހުން ފެނިފައިވަނީ ހުޅުމާލެ ފޭސް އެކެއްގެ "ރެޑްބުލް" ދަނޑު ސަރަހައްދުން ކަމަށް ފުލުހުން ބުނެފިއެވެ.
ފުލުހުން ބުނީ މިހާތަނަށް ބެލި ބެލުމުން އަޒުހާން ވަނީ ހުޅުމާލެ ފޭސް އެކެއްގައި އޭނާ ހުރި ގެސްޓް ހައުސްއިން ކާރެއްގައި ހިޔާ ފްލެޓް 13 ވަނަ ޓަވަރަށް ގޮސް އެ ޓަވަރަށް އެރުމަށްފަހު ފަތިހު 4:53 ހާއިރު އެޓަވަރު ކައިރިން ހުދުކުލައިގެ ޓެކްސީއަކަށް އަރައިގެން ފޭސް އެކެއްގައި އޭނާ ހުރި ގެސްޓް ހައުސް ސަރަހައްދަށް އެނބުރި ގޮސްފައި ކަމަށެވެ. އަދި އެ ދެ ކާރުގެ ޑްރައިވަރުން މިހާރު ދެނެގަނެވިފައިވާއިރު އެންމެފަހުން އަޒުހާން ފެނިފައިވާ ސަރަހައްދުވެސް ދެނެގަނެވިފައިވާ ކަމަށް ފުލުހުން ބުނެއެވެ.
އަޒުހާން އެންމެ ފަހުން ފެނިފައިވާ ކަމަށް މިހާރު އެނގިފައިވާ ސަރަހައްދަކީ ފޭސް އެކެއްގެ ރެޑްބުލް ދަނޑު ސަރަހައްދުން ކަމަށްވާއިރު އަޒުހާން ވައިގެ މަގުން ރާއްޖެއިން ބޭރަށް އަދި އަތޮޅު ތެރެއަށް ފުރައިގެން ގޮސްފައިނުވާ ކަމަށް މިހާތަނަށް ލިބިފައިވާ މައުލޫމާތުން އެނގޭ ކަމަށް ފުލުހުން ވަނީ ބުނެފައެވެ.
އަޒުހާން ހޯދުމުގެ މަސައްކަތް މިހާރުވެސް ފުލުހުން ކުރަމުންދާއިރު އޭނާ އެންމެ ފަހުން ފެނިފައިވާ ކަމަށް ބެލެވޭ ސަރަހައްދުގެ ސީސީޓީވީ ފޫޓޭޖްތައް ބެލުމުގެ މަސައްކަތް ފުލުހުން ކުރަމުންދާ ކަމަށް ބުނެއެވެ.
މި މަހުގެ 18 ވަނަ ދުވަހުގެ ހެނދުނު 6 ޖަހާއިރުން ފެށިގެން އަޒުހާންގެ ހަބަރެއް ނުވެގެން 19 ވަނަ ދުވަހުގެ ރޭ 7 ޖަހާއިރު އާއިލާއިން ފުލުހަށް ރިޕޯޓުކުރުމާއެކު އޭނާ ހޯދުމުގެ މަސައްކަތް ފުލުހުން ފަށާފައިވާ ކަމަށް ބުނެއެވެ. އެހެންނަމަވެސް އަޒުހާން ހޯދިފައިނުވާތީ ފުލުހުން ވަނީ އާންމު ރައްޔިތުންގެ އެހީތެރިކަމަށް އެދި އާންމުކޮށްވެސް އިއުލާންކޮށްފައެވެ.
