މިނީ ބަސް: ހިލޭ ދެ ހަފްތާ މިއަދު ނިމޭނެ، މާދަމާ ފީ ނަގާނެ

މާލޭގައި މިނީ ބަހުގެ ހިދުމަތް ދޭން ފެށުމާއެކު ހިލޭ ދަތުރުކުރެވޭނެ ކަމަށް ނިންމި މުއްދަތު ހަމަވެ، މާދަމާ އިން ފެށިގެން ފީ ނަގަން ފަށާނެއެވެ.

މާލޭގައި މިނީ ބަހުގެ ހިދުމަތް ފަށާފައިވަނީ މިމަހު 5 ވަނަ ދުވަހުއެވެ. މިގޮތުން ފުރަތަމަ ދެ ހަފުތާގައި މިނީ ބަހުން ހިލޭ ދަތުރުކުރެވެއެވެ. މާދަމާއިން ފެށިގެން މިނީ ބަހުން ދަތުރުކުރާ ކޮންމެ މީހެއްގެ އަތުން ހަތް ރުފިޔާ ނެގުމަށް ހަމަޖެހިފައި ވާއިރު ސްކޫލް ކުދިންނަށާއި ތިން އަހަރުން ދަށުގެ ކުޑަކުދިންގެ އިތުރުން، މުސްކުޅިންނަށް ދެންވެސް ހިލޭ ދަތުރު ކުރެވޭނެއެވެ.

އެމްޓީސީސީން އާންމުކުރި ތަފާސްހިސާބު ތަކަށް ބަލާއިރު، މިމަހު 5 ވަނަ ދުވަހުން މިމަހު 11 ވަނަ ދުވަހުގެ ނިޔަލަށް މިނީ ބަހުން 48،370 މީހަކު ވަނީ ދަތުރުކޮށްފައެވެ. މިދުވަސްތަކުގެ ތެރޭގައި އެންމެ ގިނަ ބަޔަކު ދަތުރުކޮށްފައި ވަނީ މިމަހު 10 ވަނަ ދުވަހުއެވެ. އެދުވަހު އެކަނިވެސް 9329 މީހަކު ވަނީ ދަތުރުކޮށްފައެވެ.

މި މުއްދަތުގެ ތެރޭގައި އޯކިޑް ރޫޓުން 18،463 މީހުން ދަތުރުކޮށްފައި ވާއިރު އަމީނީ ރޫޓުން 18،261 މީހުން އަދި ސޯސަން ރޫޓުން 8933 މީހުން ދަތުރުކޮށްފައިވާ ކަމަށް އެމްޓީސީސީން ބުނެއެވެ.

މާލޭގައި ބަސް ދަތުރުތައް ފެށުމުން ވަރަށް ބޮޑު ތަރުހީބެއް ލިބިގެންދާ ކަމަށް އެމްޓީސީސީން ފާހަގަކުރެއެވެ. މާދަމާއިން ފެށިގެން ދަތުރުތަކަށް ފީ ނަގާއިރު މިކަމާ ގުޅިގެން މިނީ ބަހުގެ ހިދުމަތް ބޭނުންކުރާ ބައެއް ފަރާތްތަކުން ބުނީ، މާލެއިން ހުޅުމާލެ އަށް 10 ރުފިޔާއިން ދެވޭއިރު މާލެ ތެރޭގައި ދަތުރުކުރުމަށް 7 ރުފިޔާ ބޮޑު ކަމަށެވެ. އަދި މާލޭގެ މަގުތައް ތޮއްޖެހުމުގެ ސަބަބުން ދަތުރުތައް ލަސް ކަމަށް ވެސް މި ހިދުމަތް ކުރާ ބައެއް ފަރާތްތަކުން ބުނެއެވެ. އެހެން ބައެއް މީހުން ބުނީ، ބަސް ލަސްވަނީ ޓެކްސީ ތަކާއި ޕިކަޕްތަކުން ޖެއްސުން ކުރާތީ ކަމަށާއި، 7 ރުފިޔާ އަކީ ރީޒަނަބަލް ހެޔޮ އަގެއް ކަމަށެވެ. އަދި ބަހުން ފީ ނެގި ނަމަވެސް އެއީ "ސަަޅި" ހިދުމަތެއް ކަމަށްވެސް ބައެއް މީހުން ބުނެއެވެ.

ޓިކެޓު ނަގާނީ ކިހިނެތް؟

ބަހުގެ ހިދުމަތް ހޯދުމަށް އާރްޓީއެލް އެޕްލިކޭޝަން އަދި ވެބް ޕޯޓަލް މެދުވެރިކޮށް ޓިކެޓް ނެގޭނެއެވެ. މި ހިދުމަތް އަލަށް ހޯދާއިރު ހިދުމަތަށް ރަޖިސްޓްރީކުރަން ޖެހެއެވެ.

ޓިކެޓް ނަގާއިރު، އެމީހަކު ބަހުގައި ދަތުރުކުރާ ރޫޓާއި، ޓިކެޓް ނަގާ އަދަދު ހިޔާރުކޮށް، ބޭންކް ކާޑު މައުލޫމާތާއި އީ-މެއިލް އެޑްރެސްއެއް ޖެހުމުން ފައިސާ ދައްކާ ޓިކެޓް ނެގޭނެއެވެ. މި ޓިކެޓް 7 ދުވަހުގެ މުއްދަތައް ބޭންވޭނެއެވެ. ބަހަށް އަރާ ޓިކެޓްގެ ކިއުއާރް ކޯޑް ސްކޭން ކޮށްލުމުން ބަހަށް ފައިސާ ދެއްކުނީއެވެ.

މިނީ ބަސްތައް ދަތުރުކުރާނީ 3 ރޫޓަކުންނެވެ. އެއީ:

• އެއީ އަޮކިޑް ރޫޓް، އަމީނީ ރޫޓް އަދި ސޯސަން ރޫޓެވެ.
• އަމީނީ ރޫޓްގައި 8 ސަރަޙައްދަކަށް ބަސް މަޑުކުރާނެއެވެ. ސޯސަން ރޫޓް އަދި އޯކިޑް ރޫޓްގައި 18 ސަރަޙައްދަކަށް ބަސް މަޑުކުރާނެއެވެ.

މައިގަނޑު ގޮތެއްގައި މިނީ ބަސް ދަތުރުކުރާނީ މަޖީދީމަގާއި އަމީނީމަގުގައެވެ. އަދި އޯކިޑުމަގު ގައި ވެސް މިނީ ބަސް ދަތުރު ކުރާނެއެވެ. އެހެންވެ، މަޖީދީމަގާއި އަމީނީމަގުގައި ޕާކްކުރުން މަނާކޮށް، ސިޓީ ކައުންސިލުން ދަނީ ޕާކިން ޒޯންތައް ގާއިމްކޮށް، މަގުމަތީގެ ނިޝާންތަކުގެ ކުލަ އާކޮށް، ޓްރެފިކް ބޯޑު ހަރުކުރުމުގެ މަސައްކަތް ކުރަމުންނެވެ.

މާލޭގައި މިނީ ބަހުގެ ހިދުމަތް ދިނުމަށް ބޭނުންކުރާނީ 20 މީހުންގެ ޖާގައިގެ 18 ބަހެކެވެ. އޭގެ ތެރޭގައި ހިމެނެނީ އާދައިގެ 12 މިނީ ބަހާއި ހަ އީވީ މިނީ ބަހެވެ.

މިނީ ބަހުގެ ހިދުމަތް ފަތިހު 5:45 އިން ދަންވަރު 12:15 އަށް ކުރާ އިރު ކޮންމެ 10 މިނެޓަކުން ކޮންމެ ބަސް ސްޓޮޕަކަށް ބަހެއް އަންނާނެ ކަމަށް އެމްޓީސީސީއިން ބުނެއެވެެ. އަދި ފުރޮޅުލީ ގޮނޑީގައި އުޅޭ މީހުންނަށް ހާއްސަ ޖާގަތައް މިނީ ބަހުގައި ހިމެނެއެވެ.