މޫސުމަށް އަންނަ ބަދަލުތަކުގެ ސަބަބުން ރާއްޖެއަށް ކުރާ އަސަރުތައް ދެނެގަތުމަށް ރާއްޖޭގެ ކަނޑުގެ އަޑީގައި ކުރާ ދިރާސާއިގައި އެކުއާނޯޓުންގެ ޓީމާ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ބައްދަލުކުރައްވައިފިއެވެ.
"މޯލްޑިވްސް ނެކްޓަން މިޝަން"ގެ މަސައްކަތްތައް ކުރިއަށް ގެންދާ މަނަވަރު "އޮޑެސީ"އަށް ރައީސް ޒިޔާރާތްކުރެއްވީ ލ. އަތޮޅުގައި ކުރިއަށްދިޔަ ވިއަވަތި ކޮންފަރެންސް ނިންމަވާލެއްވުމަށް ފަހުއެވެ.
ރައީސްގެ މި ޒިޔާރަތުގެ ތެރެއިން، މި ދިރާސާގައި ރާއްޖެއާއި އިނގިރޭސިވިލާތުން ބައިވެރިވާ މެރިން ބަޔޮލޮޖިސްޓުންނާއި މެޕިން އެކްސްޕާޓުންނާއި ބައްދަލުކުރައްވާ، މަސައްކަތްތައް ވަނީ ބައްލަވާލައްވާފައެވެ
މީގެ އިތުރުން މި ދިރާސާގައި ބައިވެރިވާ ދިވެހި ޓީމުގެ ފަރާތުން ފާއިތުވި 2 ދުވަހު ކަނޑުގެ 500 މީޓަރު އަޑިއަށްގޮސް މައުލޫމާތު އެއްކުރުމުގައި ހަރަކާތްތެރިވި 4 އެކުއާނައުޓުންނާއެކު އެމަނިކުފާނު ވަގުތުކޮޅެއް ހޭދަކުރައްވާފައިވާއިރު މި ދިރާސާގެ މަސައްކަތް ކުރިއަށްދާގޮތުގެ ތަފްސީލު ރައީސްއާ ވަނީ ހިއްސާކުރައްވާފައެވެ.
މި ޒިޔާރާތުގައި ރައީސްގެ އިތުރުން އެންވަޔަރަމަންޓް މިނިސްޓަރު އައިމިނަތު ޝައުނާއާއި ފިޝަރީޒް މިނިސްޓަރު ޑރ. ހުސެއިން ރަޝީދު ހަސަން ވެސް ބައިވެރިވެވަޑައިގަތެވެ.
މިދިރާސާ ގުޅިގެން މިމަހު 11 ވަނަ ދުވަހު އެކުއާނޯޓުންގެ ޓީމަކާ އެކު ދިވެހި ދެ އަންހެނަކު 250 މީޓަރު އަޑިއަށް ވަނީ ފީނާފައެވެ. އިނގިރޭސިވިލާތުގެ މެރިން ރިސާޗު ފައުންޑޭޝަނެއް ކަމަށްވާ ނެކްޓަން އާއި ދިވެހި ސަރުކާރާ ގުޅިގެން ހިންގާ މި ދިރާސާ ކުރުމަށް ފީނަން ބޭނުން ކޮށްފައި ވަނީ އިންސާނުންނާ އެކު ކަނޑުގެ އެންމެ ފުންމިނަށް ދަތުރު ކުރެވޭ 'އޮމެގާ ސީމާސްޓާ 2' ކިޔާ ސަބްމާސިބަލް އެކެވެ. އެ ސަބްމާސިބަލްގައި ދިވެހި ދެ އަންހެނަކާ އެކު އަންހެން ޕައިލެޓެއް ވަނީ ފީނި ސަރަހައްދުގެ މޫދުގެ އެންމެ އަޑިއަށް ފީނާފައެވެ.
މިއީ ހުސް އަންހެނުން ހިމެނޭ އެކުއަނޯޓްގެ ޓީމެއް ކަނޑުގެ ދިރާސާއެއް ކުރާ މިއީ ފުރަތަމަ ފަހަރެވެ. މި މިޝަންގައި ޖުމްލަ 40 މީހުން ބައިވެރިވާއިރު އޭގެތެރޭގައި 16 ދިވެހިންނާއި 24 ބައިނަލްއަގްވާމީ ބައިވެރިން ހިމެނެއެވެ.
ނެކްޓަން އިން ބުނެފައި ވަނީ، މި ދިރާސާގައި ދުނިޔޭގެ އެކި ކަންކޮޅުތަކުންނާއި ރާއްޖޭން އެކުލަވާލާފައިވާ ސައިންސްވެރިންނާއި ތަޖުރިބާކާރުންގެ ޓީމަކުން ކަނޑުގެ ސަތަހައިން ފެށިގެން 1،000 މީޓަރާ ހަމައަށް ސާވޭ ކުރުމަށް ކުރިއަށް ގެންދާ ދިރާސާއެއް ކަމަށެވެ.
'ނެކްޓަން މޯލްޑިވްސް މިޝަން'ގައި އިންސާނުން ގޮވައިގެން ފުން ކަނޑަށް ދާ އެންމެ ފަހުގެ ސަބްމާސިބަލް އަދި ރޮބޮޓިކް ސިސްޓަމްތައް ބޭނުންކުރުމަށް ވަނީ ހަމަޖެހިފައެވެ. ދިވެހި ސައިންސްވެރިންނާއި ނެކްޓަން ޓީމުގެ މަސައްކަތަކީ ދިވެހި ކަނޑުތަކުގެ ދިރުންތަކުގެ ސިއްހަތު ދެނެގަތުމެވެ. ރާއްޖޭގެ ކަނޑުގެ 20 ޕަސެންޓް ހިމާޔާތް ކުރުމަށް ސަރުކާރުން ކަނޑައަޅާފައިވާ ލަނޑުދަނޑި ހާސިލްކުރުމަށް ބޭނުންވާ މުހިންމު މައުލޫމާތުތައް ވެސް ހޯދުމަކީ މި ދިރާސާގެ އެއް އަމާޒެވެ.
