މަޖިލީހުގެ މެންބަރުންނަށް ރަނގަޅަށް، ގާނޫނީ ވާޖިބަށް، ފަރުވާ ނުބެހެއްޓެވޭ ކަމަށް ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ، މިއަދު ކުރިއަށްދާ މަޖިލީހުގެ ޖަލްސާ ފެއްޓެވުމުގެ ގޮތުން ދެއްކެވި ވާހަކަފުޅުގައެވެ.
ނަޝީދު ވިދާޅުވީ މިއަދުގެ މަޖިލީހުގެ ތަޅުމުގައި ހާޒިރުވެވަޑައިގެން ތިއްބެވީ 24 މެންބަރުން ކަމަށާއި 6 މެންބަރުން ސަލާމުގައި އެބަ ތިއްބެވި ކަމަށާއި އަދި ރަސްމީ ދަތުރެއްގައި 3 މެންބަރުން އެބަތިއްބެވި ކަމަށެވެ.
ނަޝީދު ވިދާޅުވީ 87 މެންބަރުންގެ މަޖިލީހެއްގައި އަދި ގަވާއިދުން މުސާރަ ލިބޭ މަޖިލީހެއްގައި ހެނދުނުގެ ޖަލްސާ ފެށޭއިރު 24 މެންބަރުން ތިއްބެވުމަކީ ގާނޫނީ ވާޖިބަށް ފަރުވާތެރިކަން ނުބެހެއްޓެވޭ ކަމަށް ގަބޫލު ކުރައްވާ ކަމަށެވެ.
މިއަދުގެ ޖަލްސާގައި ރައީސް ނަޝީދު ވަނީ މަޖިލީހުގެ ކޮމިޓީތަކުގެ ގިނަ މަސައްކަތްތަކެއް ހުރިކަން ފާހަގަކުރައްވާ އެ މަސައްކަތްތައް ހަލުވި ކުރުމަށް އެދިވަޑައިގެންފައެވެ.
ރައްޔިތުންގެ މަޖިލީހުގެ މިދައުރުގެ ޖަލްސާތައް ފެއްޓުނުފަހުން މަޖިލީހުގެ ޖަލްސާތައް ފައްޓާއިރު ތިއްބަވަނީ މަދު މެންބަރުންނެވެ.
