އާންމު ރައްޔިތުންގެ މެދުގައި، ކުންފުންޏަށް އޮތް އިތުބާރު ގެއްލޭ ގޮތަށް ހަގީގަތާ ހިލާފު ދޮގު ހަބަރު ނުފެތުރުމަށް އެމްޓީސީސީން އިލްތިމާސް ކޮށްފިއެވެ.
"ދިޔަރެސް" ނޫހުން ވަނީ މާލެ އާއި ބައެއް އެހެން ސިޓީ ތަކުގައި ބޭނުން ކުރުމަށް އެމްޓީސީސީން ބަސް ގަނެފައި ވަނީ ބޮޑު އަގުގައި، ބިޑް ކުރުމާއި ނުލާ، ކޮރަޕްޝަނަށް މަގުފަހިވާ ގޮތަށް ކަމަށް ބުނެ ރިޕޯޓެއް ޝާއިއު ކޮށްފައެވެ.
އެކަމާ ގުޅިގެން އެމްޓީސީސީން ނެރުނު ބަޔާނެއްގައި ބުނީ މި ހަފްތާގައި އެކުންފުނިން ހިދުމަތް ފެށި، ރާއްޖެ ޓްރާންސްޕޯޓް ލިންކުން، މާލެއަށް ތައާރަފު ކުރި، ބަހުގެ ހިދުމަތަށް އާންމު ރައްޔިތުންގެ ފަރާތުން، ބޮޑު ތަރުހީބެއް ލިބެމުންދާ ކަމަށެވެ. އެހެން ނަމަވެސް މިކަން ރައްޔިތުންނަށް އޮޅޭ ފަދަ ގޮތަކަށް އަދި އެ ކުންފުނި ބަދުނާމުކުރުމުގެ ނިޔަތުގައި، "ދިޔަރެސް" ނޫހުގައި މިއަދު ޝާއިއުކޮށްފައިވާ ހަބަރަކީ ކަނޑައެޅިގެން ހަގީގަތާ ހިލާފު ދޮގު ހަބަރެއް ކަމަށެވެ.
އެމްޓީސީސީން ބުނީ "ދިޔަރެސް" ނޫހުގައި ޝާއިއުކުރި ހަބަރުން، ރައްޔިތުންގެ ހިތުގައި އެ ކުންފުންޏަށާއި، އެ ކުންފުނިން ކުރިއަށްގެންދާ އުމްރާނީ ތަރައްގީގެ މަޝްރޫއުތަކާއި، ކުންފުނިން ފޯރުކޮށްދެމުން ގެންދާ ޢާންމު ދަތުރުފަތުރުގެ ހިދުމަތާމެދު، އުފެދިފައިވާ އިތުބާރާއި، ލޯބި ފަނޑު ކޮށްލަން، ގަސްތުގައި މަސައްކަތް ކޮށްފައި ވާކަން އެނގޭ ކަމަށެވެ.
މިއީ، ދެފުށް ފެންނަ މިނިވަން ނޫސްވެރިކަމެއް ދިވެހިރާއްޖޭގައި ކުރިއަށްދާ ޒަމާނެއްގައި، ހަގީގަތް އޮޅުވާލުމަށް "ދިޔަރެސް" ނޫހުން ހިންގި، ވަރަށް ނާތަހުޒީބު އަމަލެއް ކަމަށް އެމްޓީސީސީން ބުނެއެވެ.
އަދި މި ކަން ކުރުމުގެ މަގްސަދަކީ، ޒާތީ ތައައްސުބް އިސްކޮށް، ސިޔާސީ މަންފާއެއް ހޯދުމުގެ ވިސްނުމުގައި ކަން، އެމްޓީސީސީން ވަނީ ފާހަގަ ކޮށްފައެވެ.
މިފަދަ ކަންކަން މަދު ފަރާތްތަކުން ކުރަމުން ގެންދިއަ ނަމަވެސް، މީޑިއާގެ ވަސީލަތް ތަކުން، ޒިންމާދާރު ނޫސްވެރިކަމެއް ކުރަމުން ގެންދާކަން އެމްޓީސީސީން ވަނީ ފާހަގަ ކޮށްފައެވެ.
އެމްޓީސީސީން ވަނީ އެ ކުންފުނި ބަދުނާމު ވާގޮތަށް އަދި އާންމު ރައްޔިތުންގެ މެދުގައި، ކުންފުންޏަށް އޮތް އިތުބާރު ގެއްލޭ ގޮތަށް، މިފަދަ ހަގީގަތާ ހިލާފު ދޮގު ހަބަރު ނުފެތުރުމަށް "ދިޔަރެސް" ނޫހަށް އިލްތިމާސް ކޮށްފައެވެ.
