މާފަންނު ސަހަރާގައި ޕާކިން ޒޯނެއް ހެދުމަށް އެ ތަން ހުސްކުރުމުގެ ހުއްދަ އިސްލާމިކް މިނިސްޓްރީން ސިޓީ ކައުންސިލަށް ދީފިއެވެ.
މާފަންނު ސަހަރާގައި ޕާކިން ޒޯނެއް ހެދުމުގެ މަސައްކަތް ކުރަނީ، އެ ތަން ހުންނަ މަޖީދީމަގުގައި ޕާކްކުރުން މަނާކޮށްފައިވާތީއެވެ. މަޖީދީމަގުގައި ޕާކްކުރުން މަނާކޮށްފައި ވަނީ މާލޭގައި މިނީބަހުގެ ހިދުމަތް ފެށުމަށެވެ.
އެހެންވެ، ވެހިކަލް ޕާކްކުރާނެ ޖާގަތައް ހެދުމަށްޓަކައި ސަރުކާރުން ވަނީ މާފަންނު ސަހަރާ ހުސްކުރަން ނިންމައި ކައުންސިލަށް އަންގައިފައެވެ. އެތަނުގައި މީހުން ވަޅުލާފައި ވާތީ، މަސައްކަތް ފެށުމުގެ ކުރިން ކައުންސިލުން ވަނީ މިނިސްޓްރީގެ ލަފަޔަކަށް އެދިފައެވެ.
ޖަވާބުގައި މާލޭގެ މޭޔަރު ޑރ. މުހައްމަދު މުއިއްޒަށް ފޮނުވި ސިޓީއެއްގައި އިސްލާމިކް މިނިސްޓްރީން ބުނީ، އެ ތަން ސާފުކުރާއިރު، ފެންނަ ގަބުރުތަކުގެ މިނިކަށިތައް ވަކިވަކިން ސާފުކޮށް، ހުދު ފޮތިން ފަހާފައިވާ އުރައަކަށް އެޅުމަށް އަންގައިފައެވެ. އަދި ގަބުރު ކޮނުމަށް ބޭނުންކުރަން ޖެހޭނީ އުދަލި ކަމަށް، އެ ސިޓީގައި ބުންޏެވެ.
އެ ސިޓީގައިވާ ގޮތުން، ގަބުރު ކޮނުމަށް ހައިމާކު ފަދަ އާލާތްތައް ބޭނުން ނުކުރެވޭނެއެވެ.
މިދިޔަ މަހު އިސްލާމިކް މިނިސްޓްރީން ކައުންސިލަށް ހުއްދަދީފައިވީ ނަމަވެސް، މާފަންނު ސަހަރާ ސާފުކުރުމުގެ މަސައްކަތްތައް އަދި ނުފަށައެވެ.
