މާލޭ މަސް މާރުކޭޓުގެ މަތީ ފަންގިފިލާގައި މަސްތުވާތަކެތި ބޭނުން ކުރާތީ އެ ތަން ބަންދު ކޮށްފިއެވެ.
ސިޓީ ކައުންސިލުން ބުނީ، މަސް މާރުކޭޓުގެ މަތީ ފަންގިފިލާގައި މަސްތުވާތަކެތި ބޭނުންކުރަމުން ދާތީ ކައުންސިލާއި ފުލުހުންގެ ކޮންސްޓިބިއުލަރީ އާއި ޑްރަގް އެންފޯސްމަންޓް ޑިޕާޓްމަންޓް ގުޅިގެން އެ ތަނަށް ގޮސް ބަންދު ކޮށްފައި ވާ ކަމަށެވެ.
މަސް މާރުކޭޓުގެ މަތީ ފަންގިފިލާ އޮންނަނީ ވިޔަފާރި އުސޫލުން އަމިއްލަ ފަރާތްތަކަށް ކުއްޔަށް ދޫކޮށްފައެވެ.
އެ ތަނުގައި ވިޔަފާރި ކުރަމުން ދާ ބައެއް ފަރާތްތަކުން ވަނީ މަސްތުވާތަކެތި ބޭނުންކުރާ ކަމުގެ ޝަކުވާ ކޮށްފައެވެ.
މަސް މާރުކޭޓުގެ ފުރަތަމަ ފަންގިފިލާގެ އިތުރުން، ބައެއް ގޯޅިތަކާއި ހުސް ބިންތަކާއި ފަޅު ބިންތަކުގައި މަސްުވާތަކެތި ބޭނުންކޮށް އެ ތަންތަން އައްޑާތަކުގެ ގޮތުގައި ހިންގަމުންދާ ކަން އެކި ފަހަރު މަތިން ފެންމަތިވެފައިވާއިރު، ފުލުހުންގެ ކޮމިޝަނަރު މުހައްމަދު ހަމީދު މީގެ ކުރިން ވިދާޅުވި ގޮތުގައި މަސްތުވާތަކެތީގެ މައްސަލައަށް ހައްލެއް ގެނައުމުގެ ގޮތުން މަސްތުވާތަކެތީގެ ވިޔަފާރި ރޫޅާލުމަށްޓަކައި ކަމާބެހޭ ފަރާތްތަކާ ގުޅިގެން ފުލުހުން ދަނީ މަސައްކަތް ކުރަމުންނެވެ.
