މީގެ ތިން އަހަރު ކުރިން މޯލްޑިވިއަންގެ ފްލައިޓް އޮޕަރޭޝަންސްގެ ޑިރެކްޓަރު ކަމުން ދުރުކުރި މުހައްމަދު އަމީނަށް އަލުން ވަޒީފާ ދިނުން މަޑުޖައްސައިލަން އިއްޔެ އަމުރުކޮށްފިއެވެ.
އަމީން އެ މަގާމުން ދުރުކުރީ މީގެ ތިން އަހަރު ކުރިން ފެބްރުއަރީގައި އޭނާ އާ ދެކޮޅަށް ޕައިލަޓުން އިހްތިޖާޖު ކުރުމުންނެވެ. ނަމަވެސް އަމީންގެ ފަރާތުން އެ މައްސަލަ ސިވިލް ކޯޓަށް ހުށަހެޅުމުން، މިދިޔަ ޖޫން މަހު އެ ކޯޓުން ހުކުމްކުރީ:
- އަމީން ކުރިން އަދާކުރި މަގާމާ އެއް ފެންވަރުގެ މަގާމެއް 15 ދުވަހުގެ ތެރޭ ދިނުމަށް
- ގެއްލުނު މުއްދަތުގެ މުސާރަ އާއި އިނާޔަތްތައް ދިނުމަށް (އެއީ އަށް މިލިއަނެއްހާ ރުފިޔާ)
އެކަމަކު މޯލްޑިވިއަނުން ވަނީ އެ ހުކުމް ތަންފީޒުކުރުން ފަސްކުރުމުގެ އަމުރަކަށް ހައިކޯޓުގައި އެދިފައެވެ. އެ މައްސަލަ ބެލުމަށް ފަހު ހައިކޯޓުން ވަނީ، ސިވިލް ކޯޓުން ކުރި ހުކުމް ތަންފީޒުކޮށްފި ނަމަ، އައިލެންޑް އޭވިއޭޝަންގެ މަސްލަހަތަށް އުނިކަން އަތުވެދާނެ ކަމަށް ފާހަގަކުރެވޭތީ، ވަކި ގޮތެއް އަންގަންދެން އެ ހުކުމް ތަންފީޒުކުރުން މަޑުޖައްސައިލަން އަމުރުކޮށްފައެވެ.
މޯލްޑިވިއަންގެ ފަރާތުން ބުނީ، އަމީން އެ މަގާމުން ވަކިކުރުމަށް ފަހު އެހެން ޒިންމާއެއް ހަވާލުކުރާނެ ކަމަށް އަންގާފައި ވަނިކޮށް، އޭނާ ވަޒީފާ އަށް ހާޒިރުނުވުމުން ވަކިކުރީ ކަމަށެވެ. އެކަމަކު ސިވިލް ކޯޓުން ކުރި ހުކުމްގައިވާ ގޮތުން، ފްލައިޓް އޮޕަރޭޝަންސްގެ ޑިރެކްޓަރު ކަމުން އަމީން ވަކިކުރި ފަހުން މޯލްޑިވިއަނުން އެހެން ޒިންމާ އެއް އޭނާ އާ ހަވާލެއް ނުކުރެއެވެ. އެހެންކަމުން މޯލްޑިވިއަންގެ ބުނުން ރަނގަޅު ނޫން ކަމަށް އެ ހުކުމުގައިވެއެވެ.
އެ ހުކުމުގައިވާ ގޮތުން، އަމީން ވަޒީފާ އިން ވަކިކުރަންޖެހޭ ސަބަބެއް މޯލްޑިވިއަނަށް ދެއްކިފައެއް ނެތެވެ.
