ޕާކިސްތާނަށް ބޯކޮށް ވާރޭވެހި ފެންބޮޑުވުމުގެ ސަބަބުން ހާހެއްހާ މީހުން މަރުވެ އެތައްބަޔަކު ހާލުގައި ޖެހިފައިވާ މިވަގުތުގައި ދިވެހި ރައްޔިތުންގެ ހެޔޮ ދުއާއާއި ހަމްދަރުދީވަނީ ޕާކިސްތާނުގެ ރައްޔިތުންނާއެކުކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ރައީސް ސޯލިހް ކުރެއްވި ޓްވީޓެއްގައި ވިދާޅުވީ، ޕާކިސްތާނަށް ކުރިމަތިވެފައިވާ މި ހިތާމައިގައި ދިވެހި ސަރުކާރާއި، ރައްޔިތުންނާއި، އެމަނިކުފާނު ބައިވެރިވެވަޑައިގެން ޕާކިސްތާނުގެ ބޮޑުވަޒީރު ޝެހްބާޒް ޝަރީފް އާއި ޕާކިސްތާން ސަރުކާރަށް ހަމްދަރުދީ ފޮނުއްވާ ކަމަށެވެ.
މެދުނުކެނޑި ވާރޭ ވެހޭތާ އެތައް ދުވަހެއް ވެފައި ވާއިރު، ފެންބޮޑުވުމުގެ ސަބަބުން އެންމެ ބޮޑު ގެއްލުމެއް ވެފައި ވަނީ ޕާކިސްތާނުގެ ހުޅަނގު ދެނުކު ބިތުގައި އޮންނަ ބަލޫޗިސްތާނަށެވެ.
ހާލުގައި ޖެހި 30 މިލިއަން މީހުންގެ ބޯހިޔާވަހިކަމަށް އަސަރު ފޯރާފައި ވާ އިރު، އެގައުމުން ވަނީ ބައިނަލްއަގްވާމީ އެހީއަށް ގޮވާލާފައެވެ.
މަރުވި މީހުންގެ ތެރެއިން ދެބައިކުޅަ އެއް ބަޔަކީ އެސަރަހައްދަށް ނިސްބަތްވާ މީހުން ކަމަށް އެ ގައުމުގެ ޑިޒާސްޓާ މެނޭޖްމަންޓް އޮތޯރިޓީން ބުނެއެވެ.
މިއީ ޕާކިސްތާނަށް 2010ގައި ކުރިމަތިވި ފެންބޮޑުވުމުގެ ހާދިސާއަށް ވުރެ ގެއްލުން ބޮޑު ކާރިސާއެއް ކަމުން މިހާރު ވަނީ ކުއްލި ހާލަތުވެސް އިއުލާން ކޮށްފައެވެ.
