ސަރުކާރުގެ ހަރަދުގައި ހިލޭ ޑިގްރީ އަށް ކިޔެވުމުގެ ފުރުސަތު 14،000 އަށް ވުރެ ގިނަ ދަރިވަރުންނަށް ލިބިފައިވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް މިހެން ވިދާޅުވީ، މަތީ އަރުތަވެރިންގެ އިނާމު ދިނުމުގެ ޖަލްސާ ޝަރަފްވެރިކޮށްދެއްވައި ދެއްކެވި ވާހަކަފުޅުގައެވެ.
ރައީސް ވިދާޅުވީ، ރާއްޖޭގެ ޔުނިވާސިޓީތަކާއި ކޮލެޖްތަކުގައި ޑިގްރީ ފެންވަރަށް ހިލޭ ކިޔެވުމުގެ ޕްރޮގްރާމްގެ ދަށުން، މިހާތަނަށް 14930 ދަރިވަރަކަށް ފުރުސަތު ދީފައިވާ ކަމަށެވެ.
މީގެ އިތުރުން ސްޓޫޑެންޓް ލޯނުގެ ދަށުން މި ސަރުކާރުން މިހާތަނަށް 1986 ދަރިވަރަކަށް ފުރުސަތު ދީފައިވާ ކަމަށާއި އަދި 20 ގައުމެއްގެ ތަފާތު ޔުނިވާސިޓީތަކުގައި ތަފާތު ސްކޮލާޝިޕްތަކުގައި ކިޔެވުމުގެ ފުރުސަތު 468 ދަރިވަރަކަށް ފަހިކޮށްދީފައިވާ ކަމަށް ރައީސް ވިދާޅުވިއެވެ.
މިފަދަ ކިތަންމެ ފުރުސަތުތަކެއް ދަރިވަރުންގެ ކުރިމަތީގައި ހުރިކަން ފާހަގަކުރައްވާ ރައީސް ވިދާޅުވީ، ދަރިވަރުންގެ މޫނުމަތިން ފާއްދަމުންދާ ފޮނި އުންމީދުތައް ހަގީގަތަކަށް ހަދައިދިނުމަށްޓަކައި، ސަރުކާރުން ކޮށްދެވެން އޮތް ކޮންމެ ކަމެއް އެންމެ ފުރިހަމައަށް ކޮށްދިނުމަށް ތައްޔާރަށް ތިބި ކަމަށެވެ.
ރައީސް ވަނީ ދަރިވަރުން ހާސިލްކުރާ އިލްމުގެ ބޭނުން ހެޔޮގޮތުގައި ހިފައިގެން، ގައުމަށް އެންމެ ބޭނުންވާ ދާއިރާތަކުގެ ހުނަރުވެރިންނަށްވުމަށް ތައްޔާރުވާން ގޮވާލައްވާފައެވެ. އަދި ކޮންމެ ކޮންމެ ފިކުރަކަށް ނުހެއްލޭ ހޭލުންތެރި ބަޔަކަށްވުމަށް އަޒުމް ކަނޑައަޅައިގެން، ދުނިޔެއާއި ރާއްޖޭގެ އާޖުފާޖު ދަންނަ މީހަކަށްވެވޭތޯ ގަދައަޅައި މަސައްކަތް ކުރުމަށް ވެސް ރައީސް ވަނީ ގޮވާލައްވާފައެވެ.
ހިލޭ ޑިގްރީއަށް ކިޔަވައި ދިނުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހްގެ ރިޔާސީ ވައުދު ފުޅެކެވެ.
