ހުސްވެފައިވާ އެސިސްޓެންޑް އޮޑިޓް އޮފީހުގެ އެސިސްޓެންޓް އޮޑިޓަރު ޖެނެރަލްގެ މަގާމަށް އިބްރާހިމް ފަޒީލް އައްޔަނުކުރައްވައިފިއެވެ.
މިދިޔަ އާދިއްތަ ދުވަހު ފަޒީލް އެ މަގާމަށް އައްޔަންކުރެއްވިއިރު އެ ދާއިރާގައި އޭނާވަނީ 15 އަހަރު މަސައްކަތްކުރައްވާފައެވެ. އަދި ކުރިން އޮޑިޓް އޮފީހުގެ އިސް މަގާމުތައް ވެސް ފުރައްވައިފައިވާ ފަޒީލް އެންމެ ފަހުން ހުންނެވީ އޮޑިޓް އޮފީހުގެ ފައިނޭންޝިއަލް އެންޑް ކޮމްޕްލަޔަންސް އޮޑިޓްގެ ޑިރެކްޓަރެއްގެ މަގާމުގައެވެ.
ފަޒީލް ތިން އަހަރު ވަންދެން ފިނޭންސް މިނިސްޓްރީގެ ސްޓޭޓް އިންޓާނަލް އޮޑިޓް ކޮމިޓީގައި މަސައްކަތް ކުރައްވާފައިވާއިރު އޭނާއަކީ ޗާޓާޑް އިންސްޓްޓިއުޓް މެނޭޖްމަންޓް އެކައުންޓް (ސީމާ)ގެ މެމްބަރެއް ވެސް މެއެވެ.
ފަޒީލް ވަނީ އިންޑިއާގެ ބެންގަލޫރު ޔުނިވާސިޓީން ކޮމާސްއިން ބެޗެލާޒް ޑިގްރީ ހާސިލުކުރައްވައި އަދި އިނގިރޭސިވިލާތުގެ ބާމިންގްހަމް ޔުނިވާސިޓީން އޮޑިޓް މެނޭޖްމަންޓް އެންޑް ކޮންސަލްޓެންސީއިން މާސްޓާސް ޑިގްރީ ހާސިލުކުރައްވައިފައެވެ.
