އައްޑޫ ސިޓީ ހިތަދޫގެ މީހުން ދިރިއުޅޭ ގެެއެއްގައި ރޯވި އަލިފާން 15 މިނެޓް ތެރޭ ނިއްވާލައިފިއެވެ.
އެމްއެން ޑީއެފުން ބުނީ، މި ހާދިސާގެ ރިޕޯޓްކޮށް ފައި ވަނީ މިއަދު މެންދުރު 12:15 ހާއިރު އެމްއެންޑީއެފް ސަދަން އޭރިއާ ކޮމާންޑް، ސ.ހިތަދޫ ފަޔާ ސްޓޭޝަނަށް ކަމަށެވެ. އެ ރިޕޯޓް ލިބުމާއެކު ފަޔާމަނުން ވަނީ ހަރަކާތްތެރިވެފައި ކަމަށާއި އަދި އަލިފާން ނިއްވާލާފައި ވަނީ މެންދުރު 12:33 ހާއިރު ކަމަށް އެމްއެންޑީއެފުން ބުނެއެވެ.
އެގޭގައި އަލިފާން ރޯވެފައި ވަނީ ކޮޓަރިއެއްގައެވެ. އެމްއެންޑީއެފް ސަދަން އޭރިއާ ކޮމާންޑް، ސ.ހިތަދޫ ފަޔާ ސްޓޭޝަންގެ ފަޔާމަނުން ކުރި މަސައްކަތުން އެ ގޭގެ ކޮޓަރީގައި ރޯވި އަލިފާން އެއްކޮށް 15 މިނެޓް ތެރޭ ވަނީ ނިއްވާލާފައެވެ.
މީހުން ދިރިއުޅޭ ގެތަކުގައި މިފަދަ އަލިފާނުގެ ހާދިސާތައް މީގެ ކުރިން ހިންގާފައިވާ ބައެއް ހާދިސާ ތަކުގައި މީހުންނަށާއި އަދި ގެއަށާއި މުދަލަށާއި ހިފާ ގެންގުޅޭ ތަކެއްޗަށް ވެސް ބޮޑެތި ގެއްލުންތައް ލިބިފައި އެބަ ހުއްޓެވެ. ނަމަވެސް މި ހާދިސާގައި އެއްވެސް މީހަކަށް އަނިޔާއެއް ވެފައި ނުވާ ކަމަށް އެމްއެންޑީއެފުން ބުނެއެވެ.
މި ހާދިސާގައި ލިބުނީ ކިހާ ވަރެއްގެ ގެއްލުމެއް ކަމާއި އެ އަލިފާނުގެ ހާދިސާ ހިނގަން މެދުވެރިވީ ސަބަބު އަދި އެމްއެންޑީއެފުން ހާމައެއް ނުކުރެއެވެ.
