އައިޖީއެމްއެޗުގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސްއޮނެޑް ޕިނެޑާ މަރާލި ކަމުގެ ތުހުމަތުގައި ހައްޔަރުކޮށް ދައުވާކޮށްފައިވާ އޭނާގެ ފިރިމީހާ މާވިން އެސްވައި ވާގަސްއާ ދެކޮޅަށް ދައުލަތުން 110 ހެކި ހުށައަޅައިފިއެވެ.
އެ މައްސަލާގައި މާވިންގެ އިތުރުން އޭނާގެ ދިވެހި ލޯބިވެރިޔާ ހަލީމަތު ލަމްހާގެ މައްޗަށް ވަނީ ދައުވާތަކެއް ކޮށްފައެވެ. މިއަދު ލަމްހާގެ ޝަރީއަތު އަޑުއެހުން ތާވަލްކުރުމަށްފަހު ކެންސަލް ކޮށްފައިވާއިރު މާވިންގެ ޝަރީއަތުގެ އަޑުއެހުމުގައި ދައުލަތުގެ ވަކީލް ވަނީ މާވިންގެ ދައުވާތައް ސާބިތުކުރަން 110 ހެކި ހުށައަޅާފައެވެ. އޭގެތެރޭގައި ހިމެނެނީ 74 ޝަފައީ ހެކިންނާއި 36 ކިތާބީ ހެއްކެވެ.
ކިތާބީ ހެކިތަކުގެ ގޮތުގައި ދައުލަތުން ހުށަހަޅާފައިވާ ހެކީގެ ތެރޭގައި މިހާތަނަށް ނުލިބި އޮތީ މޭރީ އާއި މާވިންގެ ދަރިފުޅު އޮލިވާ ގްރޭސްގެ ސައިކޮލޮޖިކަލް އެސަސްމަންޓް ރިޕޯޓްކަމަށް ދައުލަތުން ވަނީ ފާހަގަކުރައްވާފައެވެ. ދައުލަތުން ވަނީ އެ ކުއްޖާ ހުރީ ފިލިޕީންސްގައި ކަމަށް ވާތީ އެ ރިޕޯޓް ހޯދަން ވަގުތު ބޭނުންވާ ކަމަށެވެ. އެހެންނަމަވެސް އިބްތިދާއީ މަރުހަލާ ނިމޭއިރު އެ ރިޕޯޓް ނުލިބިއްޖެނަމަ އެ ފުރުސަތު އަލުން ނުދިނަސް ފަރުވާލެއް ނެތް ކަމުގައި ދައުލަތުން ބުނެއެވެ.
މާވިންގެ ފަރާތުން ދިފާއުގައި ހެކި މިއަދު ހުށައަޅައިފާ ނުވާއިރު މާވިންއަކީ ބިދޭސީއަކަށް ވާތީ ދަތިތަކެއް ހުރިކަން ފާހަގަކޮށް ދިފާއީ ވަކީލުން ވަނީ އިތުރު ފުރުސަތެއް ދިނުމަށް އެދިފައެވެ. އެހެންންމަވެސް ދެ ފަރާތުން ހެކި ހާމަކުރަން ޖެހޭނީ އެއް އަޑުއެހުމެއްގައި ކަން ދައުލަތުން ފާހަގަކުރެއެވެ.
ގާޒީ ނިންމެވީ ދިފާއި ހެކި ލިޔުމުން ހުށަހަޅަން ހަތް ދުވަހުގެ މުއްދަތެއް ދެއްވުމަށެވެ.
އެނގިހުރެ މީހަކު މެރުމުގެ ދައުވާ މާވިންގެ މައްޗަށް އުފުލައިފައިވާއިރު މި ކުށުގެ އަސާސީ އަދަބަކީ 10 އަހަރަށް ޖަލަށް ލުމެވެ. އެކަމަކު ދައުލަތުން ބުނެފައި ވަނީ ހާދިސާ ހިނގިއިރު މި ދެ މީހުން ވެސް ތިބީ އިސްލާމީ ޝަރީއަތެއްގެ ހިމާޔަތުގައި ކަމުން އިސްލާމީ ޝަރީއަތުގައި ކަނޑައަޅައިފައި ވާގޮތަށް ކުށް ސާބިތުވެއްޖެނަމަ މަރުގެ އަދަބު ކަނޑައެޅޭނެ ކަމަށެވެ.
