ޔޯގާ ދުވަހާ ގުޅިގެން ގަލޮޅު ދަނޑުގައި އަންގާރަ ދުވަހު ބޭއްވި ހަރަކާތުގައި ހިންގި ހަމަނުޖެހުމާ ގުޅިގެން ހައްޔަރުކުރި ހަ މީހުންގެ އިތުރުން، އިއްޔެ ހައްޔަރުކުރި މީހުންގެ ވަނަވަރު އާންމުކޮށްފިއެވެ.
ފުލުހުން ބުނި ގޮތުގައި، ޔޯގާ ދުވަހު ހިންގި ހަރަކާތަށް ހުރަސް އަޅައި، އެ ހަރަކާތުގައި ބައިވެރިވި މީހުންގެ މެދުގައި ބިރުވެރިކަން އުފައްދައި، ބައެއް މީހުންނަށް ހަމަލަދީ ތަކެއްޗަށް ގެއްލުން ދިން މައްސަލައާ ގުޅިގެން އިއްޔެ ހަ މީހަކު ހައްޔަރުކޮށްފައިވާ ކަމަށެވެ. އެ ހަ މީހުންނަކީ
- ޕީޕީއެމްގެ ހަރަކާތް ކޮމިޓީގެ މުގައްރިރު މުހައްމަދު އިސްމާއީލް
- ޕީޕީއެމްގެ ކައުންސިލް މެންބަރު އިބްރާހީމް ރައްޒާން (ޓަކީ)
- ޝައިޚް އާދަމް ނިޝާން ބިން އަލީ އާދަމް
- ޝައިޚް ފަޒްލޫން ބިން މުހައްމަދު
- އަހްމަދު ނަސޫހް
- އަބްދުﷲ ރިފާއު
އެ މައްސަލައިގައި ހައްޔަރުކުރި ހަ މީހުންނަށް ބަންދުގެ މުއްދަތު ޖަހަން ކްރިމިނަލް ކޯޓަށް ހާޒިރު ކުރުމުން، އެތަނުން ނަސޫހާއި ރިފާއަށް ދެ މަހުގެ ބަންދެއް ވަނީ ޖަހައިފައެވެ. އަދި ޝައިޚް ނިޝާނާއި ޝައިޚް ފަޒްލޫނަށް ހަތް ދުވަހުގެ ބަންދެއް ޖަހާފައިވާއިރު، މުހައްމަދު އިސްމާއީލާއި ޓަކީ އަށް ޖަހާފައި ވަނީ ފަސް ދުވަހުގެ ބަންދެކެވެ.
އެ މައްސަލައިގައި ހައްޔަރުކުރި މީހުންގެ ތެރެއިން ރޭ ޝައިޚް ނިޝާން ހައްޔަރުކޮށްފައި ވަނީ ދަރިފުޅު ގޮވައިގެން ނަމާދަށް ދިޔަ ވަގުތުގައި ފުލުހުންގެ އެސްއޯއިން ޝައިޚް ނިޝާން ވަށާލުމަށް ފަހު، ނަމާދު ކުރުމަށް ފުރުސަތު ނުދީއެވެ. ޝައިޚް ނިޝާން ހައްޔަރުކުރާ ވީޑިއޯ ސޯޝަލް މީޑިއާގައި އާންމުވުމާ ގުޅިގެން، އާންމުންގެ ގިނަ ބަޔަކު ފުލުހުންނަށް ފާޑު ކިޔާފައިވެސް ވެއެވެ.
ޝައިޚް ނިޝާނާއި ޝައިޚް ފަޒްލޫން ދީނީ ދަރުސް ދިނުމުގެ ހުއްދަ، އިސްލާމިކް މިނިސްޓްރީން ވަނީ ނަގައިފައެވެ. ސަބަބެއްގެ ގޮތުގައި އެ މިނިސްޓްރީން ބުނީ އެ ގޮތަށް ނިންމާފައި ވަނީ:
- ގަލޮޅު ދަނޑުގައި އޮތް ޔޯގާގެ ހަރަކާތް ކުރިއަށް ދަނިކޮށް އެތަނަށް ވަދެގަނެ ހަމަނުޖެހުން ހިންގައި، އެއްވުމަށް ހިތްވަރު ދީފައިވާތީ
- ދެ ފަރާތުގެ މައްޗަށް ޖިނާއީ ތަހުގީގެއް ހިންގާކަން ފުލުހުން އަންގާފައިވާތީ
ޔޯގާ ދުވަސް ފާހަގަ ކުރުމަށްޓަކައި ގަލޮޅު ދަނޑުގައި ބޭއްވި ހަރަކާތް ކުރިއަށް ދިޔަ ވަގުތު ހިންގި ހަމަނުޖެހުން ތަހްގީގުކޮށް، އެ ކަމުގައި އިސްކޮށް ހަރަކާތްތެރިވި ފަރާތްތައް އިންސާފުގެ ކުރިމައްޗަށް ގެންނާނެ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެފައިވާއިރު، އެ މައްސަލަ ބެލުމަށްޓަކައި ސަރުކާރުން ވަނީ ހަތް ވަޒީރުން ހިމެނޭ ސަބް ކޮމިޓީއެއް ވެސް އެކުލަވާލައިފައެވެ.
އެ މައްސަލައިގައި ހަ މީހަކު ވަނީ މިދިޔަ އަންގާރަ ދުވަހު ހައްޔަރުކޮށްފައެވެ. އެއާއެކު، އެ މައްސަލައިގައި ހައްޔަރުކުރި މީހުންގެ އަދަދު ވަނީ 12 އަށް އިތުރުވެފައެވެ.
ފުލުހުން ދަނީ އެ މައްސަލައިގައި ބަލަން ޖެހޭ ކަންކަން އިތުރަށް ބަލަމުންނެވެ.
ޔޯގާ ދުވަހާ ގުޅިގެން ކޮންމެ އަހަރަކު ވެސް ސަރުކާރުން ހަރަކާތްތައް ކުރިއަށް ގެންދެއެވެ. ބައިނަލްއަގުވާމީ ފެންވަރުގައި ޔޯގާ ދުވަސް ފާހަގަ ކުރަން ފަށާފައިވަނީ މީގެ އަށް އަހަރު ކުރިން، ޖޫން 21 ގައެވެ.
