ޔޯގާ ދުވަހާ ގުޅިގެން މިއަދު ގަލޮޅު ދަނޑުގައި އޮތް އިވެންޓް ހުއްޓުވާ ހިންގި ހަމަ ނުޖެހުމަށް ބޭނުންކުރި ބައެއް ތަކެތި ނެރެފައިވަނީ ޕީޕީއެމްގެ އޮފީހުން ކަމަށް ފުލުހުން ބުނެފިއެވެ.
ފުލުހުން މިހެން ބުނެފައިވަނީ މިއަދު އޮތް އިވެންޓަށް ދިދަތައް ނެރެފައިވަނީ ޕީޕީއެމް އޮފީހުން ކަމަށް ބުނެ ސޯޝަލް މީޑިއާގައި ފޮޓޯތަކެއް ހިއްސާކޮށްފައިވާ ދަނޑިވަޅެއްގައެވެ.
ފުލުހުން ނެރުނު ބަޔާނުގައި ބުނީ، އެ ހަރަކާތަށް ހުރަސް އަޅައި އެ ހަރަކާތުގައި ބައިވެރިވި ބޭރު ގައުމުތަކުގެ ސަަފީރުންނާއި ޑިޕްލޮމެޓުން އަދި އާންމުންގެ މީހުންނާ ދެކޮޅަށް، ބިރުވެރިކަން އުފެދޭ ގޮތަށް އެތަނަށް ބަޔަކު ވަދެފައިވާ ކަމަށެވެ. އަދި ބައެއް މީހުންނަށް ހަމަލާދީ، ތަކެއްޗަށް ގެއްލުން ދީފއިވާ މި މައްސަލަ ސީރިއަސް މައްސަލައެއްގެ ގޮތުގައި ބަލަމުންދާ ކަމަށެވެ.
މި އަމަލު ހިންގުމުގައި ބައިވެރިވި މީހުންގެ މައްސަލަ ތަހުގީގުކޮށް ގާނޫނީ ފިޔަވަޅު އެޅުމަށް ކުރަން ޖެހޭ މަސައްކަތް ކުރަމުންދާ ކަމަށް ވެސް ފުލުހުން ބުނެއެވެ.
ފުލުހުން އިތުރަށް ބުނީ، މިހާތަނަށް ލިބިފައިވާ މައުލޫމާތްތަކުން، މި އަމަލު ހިންގި މީހުން ބޭނުންކޮށްފައިވާ ބައެއް އާލާތްތައް ނެރެފައި ވަނީ ޕީޕީއެމްގެ އޮފީހުންކަން އެނގިފައިވާ ކަމަށެވެ.
މީގެ އިތުރުން މި ހާދިސާ ހިނގުމަށް މެދުވެރިވި ސަބަބުތައް ބަލައި ފުލުހުން ރެސްޕޮންޑް ކުރިގޮތުގެ ރިވިއުއެއް އާއްމު ކުރާނެ ކަމުގެ ޔަގީންކަން ފުލުހުން ވަނީ ދީފައެވެ.
މި ހަމަނުޖެހުން ހިންގަން ޕީޕީއެމް އޮފީހުން ބައެއް ތަކެތި ގެންދިޔަ ކަމަށް ބުނާ މައްސަލައާ ގުޅިގެން އިދިކޮޅު ކޯލިޝަންގެ ޖޮއިންޓް ސްޕޯކްސްޕާސަން ހީނާ ވަލީދު ވިދާޅުވީ މިއަދު އޮތް ޔޯގައި އިވެންޓަށް ޕީޕީއެމް އިން ދިދަ ތައް ދީފައިވާ ކަމަށެވެ. އެއީ އެހެން އިވެންޓުތަކަށް ވެސް ޕީޕީއެމްގައި ބޭނުން ކުރާ ލައުޑް އާއި ދިދަ އަދި ލޮރީ ފަދަ ތަކެތި ވެސް ފޯރުކޮށްދޭ އުސޫލުން ކަމަށް ހީނާ ވިދަޅުވިއެވެ.
ހެނދުނު 6:30 ގައި ޔޯގާ ހަރަކާތް ފަށަން ތައްޔާރުވެފައި އޮއްވާ، ޒުވާނުންގެ ބަޔަކު "ﷲ އަކްބަރު" ގޮވަމުން ވަދެ ދަނޑުން "ނުކުތުމަށް" ގޮވާ ހަޅޭ ލަވާ، ދަނޑުގެ އެ މައިދާނުގައި ޖަހާފައި ހުރި ދިދަ ދަނޑިތައް އުފުރާ، ޔޯގާ ހަދާ މީހުން އަޅައިގެން ތިބި މެޓްތައް ނަގާ ހަދާފައިވެއެވެ. އަދި ފެންފުޅިއާއި، ޕޭމަންޓް ގާވެސް އުކާފައިވެއެވެ.
މިހާދިސާގައި ބައެއް މީހުންނަށް އަނިޔާވި ކަމަށް "ދަ ޕްރެސް" އަށް ވަނީ މައުލޫމާތު ލިބިފައެވެ.
ދަނޑަށް ވަދެގަތް މީހުން މައިތިރިކުރަން ގިނަ އަދަދެއްގެ ފުލުހުން ދަނޑަށް ވަނެވެ. އަދި ޕެޕާ ސްޕްރޭ ޖަހާ އެމީހުން ދަނޑުން ނެރެގެން މަޖީދީ މަގުން ފަހާ ވަނީ ދުރަށް ފޮނުވާލާފައެވެ. އެ ކުރިމަތި ލުމުގައި އިހުތިޖާޖުގެ ބައެއް ބައިވެރިންނަށްވެސް ވަނީ އނަިޔާވެފައެވެ. މި ހަމަނުޖެހުމާ ގުޅިގެން 6 މީހަކު ވަނީ ހައްޔަރު ވެސް ކޮށްފައެވެ.
