ރާއްޖެއިން ބޭރުގައި ހިނގާ ހަނގުރާމައެއްގައި ބައިވެރިވާން ރާއްޖެއިން ދިއުމުގެ ދައުވާ އުފުލާފައިވާ ދެމީހެއްގެ މައްސަލައިގެ އަޑުއެހުން މާދަމާ ކްރިމިނަލް ކޯޓުގައި ތާވަލް ކޮށްފިއެވެ.
ކްރިމިނަލް ކޯޓުން ބުނީ، ރާއްޖެއިން ބޭރުގައި ހިނގާ ހަނގުރާމައެއްގައި ބައިވެރިވާން ރާއްޖެއިން ދިއުމުގެ ދައުވާ އުފުލާފައިވާ އަހްމަދު އަޒްހަރު އަޒީމް، މއ. އަމީނީވިލާ 7، މާލެ އާއި އަލީ ހަމްޒަތު، ސީސަންގެ، ގދ. ވާދޫ ގެ އަޑުއެހުމެއް މާދަމާ މެންދުރު ފަހު 2:00 ގައި ވަނީ ތާވާލްކޮށްފައި ކަމަށެވެ.
މި މައްސަލައިގައި ހިމެނޭ ހަމްޒަތަކީ ފެބްރުއަރީ 4، 2020 ދުވަހުގެ ރޭ ޗައިނާގެ ދެ މީހަކާއި އޮސްޓްރޭލިއާގެ މީހަކަށް ހުޅުމާލޭގައި ތޫނު އެއްޗަކުން ހަމަލާދިން މައްސަލައިގައި ހައްޔަރު ކުރި މީހެކެވެ.
ސީރިޔާގައި ހިނގަމުންދާ ދާހިލީ ހަނގުރާމަތަކުގައި ދިވެހިން ބައިވެރިވާ މައްސަލަތައް ދޭތެރެ ދޭތެރެއިން ފެންމަތިވެއެވެ. މި ފަދަ މައްސަލަތަކުގައި ދާ މީހުން ހައްޔަރު ކުރަމުން އަންނަ އިރު ރާއްޖޭގައި ހަރުކަށި ފިކުރު ފެތުރުމާއި ހަރުކަށި ފިކުރާ ގުޅުން ހުރި މައްސަލަތަކުގައި ވެސް އަމަލީ ގޮތުން ބައިވެރިވާ ފަރާތްތައް އަންނަނީ ހައްޔަރު ކުރަމުންނެވެ.
