އެމްޓީސީސީން އާ 2 ރޫޓެއްގައި ބަހުގެ ހިދުމަތް ދިނުމަށް ތާވަލުކޮށްފިއެވެ.
ހުޅުމާލެ ފޭސް 2 ގައި ރޭ ބޭއްވި ހަފުލާގައި އާ ބަސްތައް އިފްތިތާހު ކޮށްދެއްވީ ރައީސުލްޖުމްހޫރިއްޔާ އިބްރާޙިމް މުހައްމަދު ސޯލިހެއެވެ. މި ބަދަލާއެކު ސެޕްޓެމްބަރު 30، 2021 ވަނަ ދުވަހު ހުޅުމާލެ ދެވަނަ ފިޔަވައްސަށް ތައާރަފު ކުރި ބަހުގެ ހިދުމަތް ފުޅާވެ، ގްރޭޓާ މާލެ ސަރަހައްދުގައި މިހާރު ދެމުންގެންދާ 6 ރޫޓުގެ ބަދަލުގައި 8 ރޫޓެއްގެ ހިދުމަތް ކަސްޓަމަރުންނަށް ލިބިގެންދާނެ ކަމަށް އެމްޓީސީސީން ބުނެއެވެ.
ހަމައެހެންމެ ހުޅުމާލެ ދެވަނަ ފިޔަވަހިން މާލެ ވެސްޓްޕާކަށް ދަތުރުކުރާ ޑައިރެކްޓް ބަސް ރޫޓް މިހާރު އޮޕަރޭޓް ކުރެވެމުންދާ އަވަސްމިން ޕީކް ގަޑީގައި 15 މިނިޓަށް އަދި އޮފްޕީކް ގަޑީގައި 20 މިނެޓަށް ބަދަލުވެގެން ދާނެ ކަމަށް ވެސް އެކުންފުނިން ބުނެއެވެ.
އެމްޓީސީސީން ބުނީ ފްލީޓަށް އިތުރުކުރެވޭ 15 ޑަބަލް ޑެކާ ބަހާއެކު ޖުމްލަ 46 ބަހެއް ހިދުމަތުގައި ދެން ބޭނުން ކުރެވޭނެ ކަމަށެވެ. މި އާ ބަސް ރޫޓްތަކުގެ ހިދުމަތުގެ އަގަކީ ޕަސިންޖަރަކަށް 15 ރުފިޔާ ކަމަށާއި މިހާރުވެސް ބޭނުންކުރަމުންދާ ބަސް ކާޑު އާ ރޫޓުތަކުން ހިދުމަތް ހޯދުމުގައިވެސް ކަސްޓަމަރުންނަށް ބޭނުންކުރެވޭނެ ކަމަށް އެމްޓީސީސީން ބުނެއެވެ.
އެމްޓީސީސީން ވަނީ އިތުރުކުރި ބަސްތަކާއެކު ގްރޭޓާ މާލެ ސަރަހައްދުގެ ރައްޔިތުންނައް އަދި ވަކިން ހާއްސަކޮށް ހުޅުމާލެ 2 ވަނަ ފިޔަވަހީގައި ދިރިއުޅޭ ރައްޔިތުންނަށް ބަހުގެ ހިދުމަތް ހޯދުމުގައި ދިމާވަމުން އައި ދަތިތަކަށް ހައްލު ލިބި، އިތުރު ލުއިފަސޭހަކަން ލިބިގެންދާނެކަމަށް ޤަބޫލުކުރާ ކަމަށެވެ.
އާ ބަސް ރޫޓުތަކުގެ ތަފްސީލް:
- ހުޅުމާލެ ދެވަނަ ފިޔަވަހި – މާލެ ވެސްޓް ޕާކް ޑައިރެކްޓް ރޫޓް (މިހާރު އޮޕަރޭޓް ކުރެވެމުންދަނީ 1 ގަޑިއިރުގެ އަވަސްމިނުގައި)
- ހުޅުމާލެ ދެވަނަ ފިޔަވަހި – މާލެ ކާނިވަލް ޑައިރެކްޓް ރޫޓް (އާ ރޫޓެއް)
- ހުޅުމާލެ ދެވަނަ ފިޔަވަހި – ވެލާނާ އިންޓަނޭޝަނަލް އެއަޕޯޓް ޑައިރެކްޓް ރޫޓް (އާ ރޫޓެއް)
ރާއްޖޭގައި ދަތުރުފަތުރުގެ ހިދުމަތް ފޯރުކޮށްދޭ އެންމެ ބޮޑު ކުންފުނީގެ ހައިސިއްޔަތުން، އެމްޓީސީސީގެ މަގްސަދަކީ އެކަށީގެންވާ އަގުތަކެއްގައި ލުއިފަސޭހަ ކަމާއެކު ބޭނުން ކުރެވޭ، ކަނޑާއި އެއްގަމުގެ ދަތުރުފަތުރުގެ ހިދުމަތެއް ރައްޔިތުންނަށް ފޯރުކޮށް ދިނުމުގައި ދެމިތިބުން ކަމަށް އެކުންފުނިން ބުނެއެވެ.
