މީގެ ފަސް މަހެއްހާ ދުވަސް ކުރިން މާލޭގެ ގެއެއްގައި ނައްޓާލާފައި ހުރި ދޮރުފަތެއް ވަގަށް ގެންދިޔަ މައްސަލައެއްގައި ހޯދާ މީހަކު ނުފެނިގެން ފުލުހުން އާންމުންގެ އެހީތެރިކަމަށް އެދި، ވީޑިއޯއެއް އާންމުކޮށްފިއެވެ.
އެ ވީޑިއޯ އިން ފެންނަ ގޮތުގައި އެ މައްސަލައިގައި ތުހުމަތުވާ މީހާ ހުރީ މާސްކް އަޅައިގެން، އަތް ކުރު ގޮޅި ޖެހި ގަމީހެއް ލައިގެންނެވެ. އޭނާ އެ ގެއިން ނުކުންނަ މަންޒަރު އެ ވީޑިއޯއިން ފެނުނު ނަމަވެސް، އިތުރު މަންޒަރެއް ފެނިފައެއް ނުވެއެވެ.
ފުލުހުން ބުނީ، އެ މީހާއަކީ މިދިޔަ ޖެނުއަރީ މަހުގެ 14 ގެ ވަގުތެއްގައި މާފަންނު ރަތްވިލާމަގުގައި ހުރި ގެއެއްގެ ދޮރުފަތް ނައްޓާލާފައި ބަހައްޓާފައި ހުއްޓާ ވަގަށް ގެންގޮސްފައިވާ މައްސަލައަކާ ގުޅިގެން ގަލޮޅު ފުލުހުން ކުރަމުންދާ ތަހުގީގަކަށް ހޯދާ މީހެއް ކަމަށެވެ.
ނަމަވެސް، މިހާތަނަށް ކުރި މަސައްކަތުން އޭނާ ދެނެގަނެވިފައި ނުވާ ކަމަށް ފުލުހުން ބުންޏެވެ.
އެހެންކަމުން އެ ވީޑިއޯ އާންމުކޮށް ފުލުހުން ވަނީ އޭނާ އާ ބެހޭ އެއްވެސް މައުލޫމާތެއް ލިބިފައިވާ ނަމަ، ގަލޮޅު ފުލުހުންގެ ނަންބަރު 9631696 އާ ގުޅައި އެ މައުލޫމާތު ހިއްސާކުރުމަށް އެދިފައެވެ.
