ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން މީގެ އަހަރެއް ކުރިން ދިން ހަމަލާގެ މައްސަލައިގައި ދައުވާ ލިބޭ މީހުންގެ ތެރޭގައި ހިމެނޭ އިސްހާގުގެ ދަރިއަށް ދައުވާ ކުރަން ފޮނުވަން އެމްޑީޕީން ގޮވާލައިފިއެވެ.
މޭ 6 ގައި ނަޝީދު އަވަހާރަކޮށްލަން ދިން ހަމަލާގެ މައްސަލައިގައި ދައުވާ ލިބޭ މީހުންގެ ތެރޭގައި އެންމެ އިސްކޮށް ހަރަކާތްތެރިވި އެކަކު ކަމަށްވާ އިސްހާގު ވަނީ، އެ މައްސަލަ ބައްލަވާ ބެންޗުގެ ރިޔާސަތު ބަލަހައްޓަވާ އިސްގާޒީ އާދަމް މުހައްމަދު އެ މައްސަލައިން ތަނާޒުލްވެ ވަޑައިގަތުމަށް އެދި ސިޓީއެއް ފޮނުވައިފައެވެ.
އެކަމާ ގުޅިގެން މިއަދު ނެރުނު ބަޔާނުގައި އެމްޑީޕީން ބުނިގޮތުގައި، އެއީ އެ ޕާޓީން ނުހަނު ކަންބޮޑުވާ ކަމެކެވެ.
އެ ބަޔާނުގައި އެ ޕާޓީން ބުނީ، ގާޒީ އާދަމްގެ ފަރާތުން އެ އެޅުއްވި ފިޔަވަޅަކީ އިންސާފުން ޝަރީއަތް ގެންދިއުމަށް އެޅުއްވި މުހިންމު ފިޔަވަޅެއް ކަމަށެވެ. ނަމަވެސް އެ މައްސަލައިގެ އަޑުއެހުންތައް މެދުކެނޑުމެއް ނެތި ނިންމާލުން އެއަށް ވުރެ މުހިންމު ކަމަށް ވެސް ބުންޏެވެ.
"ނޫންނަމަ، މި ދަނޑިވަޅުގައި، ދައުލަތުގެ ވަކީލުންނަށާއި ހެކިވެރިންނަށް، ތުހުމަތު ކުރެވޭ އިސްހާގުގެ ދަރި ނުވަތަ އެހެން ފަރާތަކުން ވެސް، އަނެއްކާ ބިރުދެއްކުމަކީ އެކަށީގެންވާ ކަމެއް." އެމްޑީޕީން ނެރުނު ބަޔާނުގައިވެއެވެ.
އަދި ގާޒީ އާދަމް ތަނާޒުލްވެ ވަޑައިގަންނަވަން ޖެހިވަޑައިގަތީ އިސްހާުގުގެ ދަރި އަދިވެސް ދޫވެފައި، ސަރުކާރު ކުންފުންޏެއްގެ ވަޒީފާގައި ހުރުމުން ކަމަށް ބުނެ، އެމްޑީޕީން ވަނީ އެކަން ކުށްވެރިކޮށްފައެވެ.
އެހެންކަމުން، ކްރިމިނަލް ކޯޓުން މި މައްސަލަ ބައްލަވާ ބެންޗު އަލުން އެކުލަވާލައި، އަޑުއެހުންތައް ވިދިވިދިގެން ގެންދިއުމަށް އެ ޕާޓީން ގޮވާލާފައިވެއެވެ.
"އަދި މި ބިރުދެއްކުމުގެ މައްސަލައަށް ހަ މަހަށް ވުރެ ގިނަ ދުވަސް ވެފައިވާއިރު، މި ޕާޓީން އެދެނީ ތަންފީޒީ އިދާރާތަކުން މިކަން ސަމާލުކަމާއެކީ ބައްލަވައި، ދައުވާކުރަން ފޮނުވުމަށް. ނުވަތަ މި އަމަލު ހިންގި ފަރާތް [އިސްހާގުގެ ދަރި]، ޓެގު އަޅުވައިގެން މޮނިޓާ ކުރުމަށް." އެ ބަޔާނުގައިވެއެވެ.
އިސްހާގު ފޮނުވި ސިޓީ އާ ގުޅިގެން، މޭ 6 މައްސަލައިގެ ޝަރީއަތުގެ މަރުހަލާ އިއްޔެ ފެށުމުގެ ކުރިން ގާޒީ އާދަމް ވިދާޅުވީ، އެ ސިޓީގައި އިސްހާގު ބުނެފައި ވަނީ ގާޒީ އާދަމް އެ މައްސަލަ ބެލުމަކީ މަސްލަހަތު ފުށޫއަރާ ކަމެއް ކަމަށެވެ. އެހެންކަމުން އެ މައްސަލައިން ގާޒީ އާދަމް ތަނާޒުލް ވާން ވަނީ އެދި، އިއްޔެގެ އަޑުއެހުން ކުރުކޮށްލެއްވިއެވެ.
ފާހަގަކޮށްލެވޭ ގޮތުގައި ބްލޮގަރު ޔާމީން ރަޝީދުގެ މައްސަލަ ވެސް ބައްލަވާފައި ވަނީ ގާޒީ އާދަމެވެ. އެ މައްސަލައިގައި އިސްހާގު ނިސްބަތްވާ ކުދެހިގޭ ހަސަން ޝިފާޒަށް ދައުވާ ކުރިއިރު، އެ މައްސަލަ ހިނގަމުން ދިޔަ ވަގުތު އިސްހާގުގެ ދަރިއަކު ވަނީ ގާޒީ އާދަމަށް އިންޒާރު ދީފައެވެ. ޝިފާޒަކީ އިސްހާގުގެ އެއްބަނޑު އެއްބަފާ މީހެކެވެ.
