މިދިޔަ އަހަރު ލިބުނު ފައިދާއިން ހިއްސާއަކަށް 60 ލާރި ބަހަން އެމްޓީޑީސީން ނިންމައިފިއެވެ.
އެމްޓީޑީސީން ބުނީ، މިގޮތަށް ނިންމާފައިވަނީ މިދިޔަ ހަފްތާގައި އެ ކޯޕަރޭޝަނުން ބޭއްވި ޑިރެކްޓަރުންގެ ބޯޑުގެ ބައްދަލުވުމުގައި ކަމަށެވެ.
މިދިޔަ އަހަރު އެމްޓީޑީސީން ހިއްސާއަކަށް ބަހަން ނިންމާފައި ވަނީ 50 ލާރިއެވެ. އެ ކޯޕަރޭޝަނަށް 2020 ވަނަ އަހަރު ފައިދާގެ ގޮތުގައި ލިބިފައިވަނީ 50.9 މިލިއަން ރުފިޔާގެ ފައިދާއެކެވެ. އެއީ 11 އަހަރުގެ މެދުކެނޑުމަކަށް ފަހު، އެ ކޯޕަރޭޝަނުން ހިއްސާގެ ފައިދާ ބަހަން ފެށި ފުރަތަމަ ފަހަރެވެ.
ނިމިދިޔަ އަހަރު އެމްޓީޑީސީއަށް ފައިދާގެ ގޮތުގައި ލިބިފައިވަނީ 211 މިލިއަން ރުފިޔާއެވެ. އެހެންކަމުން އެއީ 2020 އަށް ވުރެ 300 ޕަސެންޓު އިތުރު އަދަދެކެވެ. އެ ކޯޕަރޭޝަނުން ބުނި ގޮތުގައި އެހާ ބޮޑު ފައިދާއެއް ލިބިފައި ވަނީ އެ ކުންފުނިން ލީޒްކޮށްފައިވާ ރަށްރަށުގެ އެއްބަސްވުންތައް ފައިދާވާ ގޮތަށް ބަދަލު ކުރުމުންނެވެ.
އެމްޓީޑީސީން އެންމެ ފުރަތަމަ ހިއްސާ ވިއްކަން ފަށާފައިވަނީ މީގެ 15 އަހަރު ކުރިން، 2007 ވަނަ އަހަރުގައެވެ. އެ އަހަރުން ފެށިގެން 2014 ގެ ނިޔަލަށް ހިއްސާ ވިއްކާފައިވަނީ 100ރ އަށް ހިއްސާއެކެވެ.
