ހަކަތަރި ސާމާނު އަގުހެޔޮކޮށް އާންމުންނަށް ހޯދޭނެ މަގު ފަހިކުރުމަށްޓަކައި ތައްޔާރުކޮށްފައިވާ ފައިނޭންސިން ސްކީމުގެ އެއްބަސްވުމުގައި އެންވާރަމަންޓަ މިނިސްޓްރީ އިން މޯލްޑިވްސް އިސްލާމިކް ބޭންކާއެކު ސޮއިކޮށްފިއެވެ.
މިއަދު މިކަމަށްޓަކައި ބޭއްވި ރަސްމިއްޔާތެއްގައި މިނިސްޓްރީގެ ފަރާތުން ސޮއިކުރެއްވީ އެންވާރަމަންޓް މިނިސްޓަރު އާމިނަތު ޝައުނާއެވެ. އަދި މޯލްޑިވްސް އިސްލާމިކް ބޭންކުގެ ފަރާތުން ސޮއިކުރެއްވީ އެކްޓިން ސީއީއޯ އަހްމަދު ރިޒާއެވެ.
މި އެއްބަސްވުމުގެ ދަށުން ހަކަތަރި ސާމާނު ބޭނުންކުރުމަށް ބާރުއެޅުމުގެ ގޮތުން ފައިނޭންސިންގް ސްކީމެއް ބޭންކުންކުރިއަށް ގެންދާނެ ކަމަށް މިނިސްޓްރީން ބުނެއެވެ.
މިނިސްޓްރީން ބުނީ ފައިނޭންސިންގް ސްކީމު ތައްޔާރުކޮށްފައިވަނީ ލިސްޓް ބޭސްޑް ފައިނޭންސިން ސްކީމެއްގެ ގޮތުގައި ކަމަށާއި މިސްކީމުން ގަނެވޭނީ ހަކަތަރި ޕްރޮގުރާމުގެ ދަށުން ލޭބަލް ޖަހާފައިވާ ތަކެތީގެ ލިސްޓުގައި ހިމެނޭ ތަކެތީގެ ތެރެއިން 3، 4، އަދި 5 ތަރީގެ ތަކެތި ކަމަށެވެ. ހަކަތަރި ޕްރޮގްރާމަކީ ރާއްޖެ ތަރައްގީވެ ކުރިއަރައިގެން އަންނައިރު ދެމެހެއްޓެނިވި ގޮތުގައި ކުރިއެރުމަށް ކުރެވޭ މަސައްކަތެއް ކަމަށް މިނިސްޓްރީން ބުނެއެވެ.
ސޮއިކުރި ރަސްމިއްޔާތުގައި މިނިސްޓަރު ޝައުނާ ވިދާޅުވީ ފައިނޭންސިންގް ސްކީމްގެ ދަށުން ހަކަތަރި ލޭބަލްޖެހި ސާމާނު ގަނެދިނުމަށް ހަމަޖެހިފައިވަނީ 10 ޕަސަންޓް ރޭޓުގައި ކަމަށެވެ. އަދި މިއީ މިހާތަނަށް މިފަދަ ސްކީމަކުން ތަކެތި ގަނެދޭ އެއްމެދަށް ރޭޓު ކަމަށް ޝައުނާ ވިދާޅުވިއެވެ.
މިނިސްޓްރީން ބުނީ، ބޭންކުން މިފައިސާ ބޭނުންކުރާނީ ސްކީމް ހިންގުމަށް ގެރެންޓީއެއްގެ ގޮތުގައި ކަމަށާއި އަދި ހަކަތަރި ލޭބަލްޖެހި ސާމާނު ގަތުމަށް ބޭނުންވާ ފަރާތްތަކަށް މިސްކީމުން އެތަކެތި ގަނެދޭނީ ބޭންކުގެ ފައިސާއިން ކަމަށެވެ.
ބޭންކުގެ ފަރާތުން 15،360،000 ރުފިޔާ އާހަމައަށް ހަކަތަރި ލޭބަލް ޖެހި ސާމާނު ސްކީމުން ގަނެވޭނެ ކަމަށް މިނިސްޓްރީން ބުނެއެވެ.
