އުމްރާއަށް ގޮސް އުޅުނު މީހަކު މަރުވެއްޖެއެވެ.
މަރުވެފައިވަނީ އުމުރުން 71 އަހަރުގެ ސަޢީދު ޔޫސުފް ކިޔާ މީހެކެވެ.
އެމީހާ އުމްރާއަށް ދިޔައީ ޒަމްޒަމް ހައްޖު އެންޑް އުމްރާ ޓްރެވަލްގެ ހަވާލުގައެވެ.
މިދިޔަ ރޯދަ މަހު އުމްރާއަށް ދިޔަ ސައީދު މަރުވީ، ހާލު ދެރަވެ، މައްކާގެ ކިންގް ފައިސަލް ހޮސްޕިޓަލުގައި ފަރުވާ ހޯދަމުން ދަނިކޮށް މިއަދުގެ ވަގުތެއްގައި ކަމަށް ޒަމްޒަމް ގްރޫޕުން ވަނީ ބުނެފައެވެ.
އުމްރާއަށް ގޮސް އުޅެނިކޮށް މިދިޔަ މަހުގެ ފަހުކޮޅު ވެސް ވަނީ ދިވެއްސަކު މަރުވެފައެވެ. އެއީ އޭދަފުށީ މާބަގީޗާގޭ 76 އަހަރުގެ އަބޫބަކުރު ހަސަންއެވެ. އޭނާ މަރުވީ މިދިޔަ މަހު 27 ވަނަ ދުވަހު ފަތިސް ނަމާދު ކޮށްގެން އެނބުރި ހޮޓަލަށް ދިޔަތަނާ ކަމަށް މައުލޫމާތު ލިބެއެވެ.
އާއިލާއާއެކު އަބޫބަކުރު އުމްރާއަށް ދިޔައީ އަންހެނުންނާއި ހުރިހާ ކުދިންނާއި ބައެއް ކާފަ ކުދިންވެސް ގޮވައިގެނނެވެ. އޭނާ އުމްރާއަށް ދިޔައީ މުސާފިރީން އުމްރާ ގުރޫޕްގެ ހަވާލުގައެވެ.
