މިދިޔަ މަހުގެ 20 ވަނަ ދުވަހުގެ ރޭ ޕިކަޕަކަށް އަރުވައިގެން ގެންދަނިކޮށް ފުލުހުން އަތުލައިގެން 17 ކިލޯގެ މަސްތުވާތަކެތީގެ މައްސަލައިގައި ހައްޔަރުކުރި ދެ ބިދޭސީއިން އިއްޔެ ކްރިމިނަލް ކޯޓުން ދޫކޮށްލައިފިއެވެ.
ފުލުހުންގެ ޑްރަގް އެންފޯސްމަންޓުން ހިންގި އޮޕަރޭޝަނުގައި 17 ކިލޯގެ މަސްތުވާތަކެތި އަތުލައިގަތީ ސޯސަންމަގާއި ރަތްވިލާމަގު ގުޅޭ ކަންމަތިން ދިޔަ ޕިކަޕެއްގެ ތެރެއިންނެވެ. އެ މައްސަލައާ ގުޅިގެން ފުލުހުން ހައްޔަރުކުރީ ދެ ދިވެހިންނާއި ދެ ބިދޭސީންނެވެ. އެއީ ކ، ހިންމަފުށި، ސީސަންގެ، އަބްދުﷲ އަހްތަރާއި ކ،މާލެ، ގ. ބްރައިޓްސްޓާ، މުހައްމަދު އިމްއާން ޝަމީލް ގެ އިތުރުން މުހައްމަދު ބުރުހާނުއްދީން އާއި އަބްދުއްރަހުމާނެވެ.
އޭގެ ތެރެއިން ދެ ބިދޭސީން ވެސް ޝަރުތުކޮށްފައި ދޫކޮށްލައިފައި ވާއިރު އެ ދެ މީހުންގެ ޕާސްޕޯޓު ތަހުގީގު ނިމެންދެން ހިފެހެއްޓުމަށް ވަނީ ނިންމާފައެވެ. އެ މީހުންނަކީ އެކި ފަރާތްތަކުން ބުނުމުން ފައިސާއަށް މަސައްކަތް ކޮށްދޭ ބައެއް ކަމަށް ދެ މީހުންވެސް ކޯޓުގައި ވަނީ ބުނެފައެވެ. އަދި މަސްތުވާކެތި ހުރި ފޮށިގަނޑު ބޭލީ ވެސް ފައިސާއަށް ކަމަށްވެސް އެ މީހުން ވަނީ ބުނެފައެވެ.
ކޯޓު އަމުުރުގައިވާ ގޮތުން އެ މައްސަލައިގައި ހިމެނޭ ދިވެހި ދެ މީހުންނަކީވެސް މަސްތުވާކެތީގެ މައްސަލަތަކުގައި ހައްޔަރުކުރުމުގެ އިތުރުން ބަންދުކުރުމުގެ ރެކޯޑުތައް ގިނަ ދެ މީހުންނެވެ.
އެ މަސްތުވާތަކެތި އެތެރެކުރަން އުޅުނީ ފާޓިލައިޒާ ޝިޕްމަންޓެއްގައި އޯގަނިކް ފާޓިލައިޒާގެ ގޮތުގައި ޑިކްލެއާކޮށްގެން ކަމަށާއި އެ ތަކެތި ރާއްޖެ އެތެރެކުރީ އިންޑިއާގެ ޓްރިވެންޑްރަމުން ރާއްޖެ އައިސްފައިވާ އެއާ ކާގޯ ޝިޕްމަންޓެއްގައި ކަމަށް ކަސްޓަމްސްއިން ބުނެއެވެ. އަދި އެ ޝިޕްމަންޓުގައި ހުރި 'އޯގަނިކް ފާޓިލައިޒާ' ޕެކެޓުތަކުގެ ތެރެއިން މަސްތުވާތަކެތި ކަމަށް ޝައްކުކުރެވޭ ތަކެތި ފެނުނު ކަމަށާއި ކަސްޓަމްސްއިން އެ ތަކެތި ތަހުލީލުކުރުމުން މަސްތުވާތަކެތީގެ ބާވަތެއް ކަމަށްވާ ކެނެބިސް (ހަޝިޝް އޮއިލް)އަށް ޕޮޒިޓިވްވެފައިވާ ކަމަށް ވެސް އެ ސާވިސްއިން ވަނީ ބުނެފައެވެ.
އެ 17 ކިލޯގެ މަސްތުވާތަކެތީގެ މަގުމަތީގެ އަގު 13.6 މިލިއަން ރުފިޔާއަށް އަރައެވެ.
