ސިއްހީ ދާއިރާއަށް ރައްޔިތުންގެ އިތުބާރު ލިބެމުން އަންނަ ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ، ދުނިޔޭގެ ސިއްހަތު ދުވަހުގެ ރަސްމީ ޖަލްސާގައި ވާހަކަދައްކަމުންނެވެ.
މިނިސްޓަރު ވިދާޅުވި ރައީސް އިބްރަހިމް މުޙައްމަދު ސާލިހު، ވެރިކަމާ ހަވާލުވެ ވަޑައިގަތުމަށް ފަހު، އެންމެ ބޮޑަށް އަހައްމިއްޔަތުކަން ދީފައިވާ ކަންކަމުގެ ތެރޭގައި، ތިމާވެއްޓާ އިންސާނުންގެ ސިއްހަތު ރައްކާތެރިކުރުން ހިމެނޭ ކަމަށެވެ.
ވަކިން ހާއްސަކޮށް، "ހަށިހެޔޮ ދުޅަހެޔޮ" ރައްޔިތެއް ބިނާ ކުރުމަށާއި، ރައްޔިތުންގެ ސިއްހީ ރައްކާތެރިކަމާ، ބޭސްފަރުވާގެ ކަންކަން ކަށަވަރުކުރުމަށް، މި ސަރުކާރުން އަލަށްފެށި މަޝްރޫއުތަކުގެ ކާމިޔާބުން، ސިއްހީ ދާއިރާއަށް އިނިގުލާބީ ބަދަލުތަކެއް އަންނަމުންދާ ކަން މިނިސްޓަރު ފާހަގަކުރެއްވިއެވެ.
މިއަދު ރައްޔިތުންގެ އިތުބާރު ސިއްހީ ދާއިރާއަށް ލިބެމުން ދަނީ، ރައީސް ސޯލިހު ސިއްހީ ނިޒާމު އަލުން ބައްޓަންކޮށް ސިއްހީ ހިދުމަތް ފޯރުކޮށްދިނުމުގައި ސަރުކާރުން ގެންނަމުންދާ ހެޔޮ ބަދަލުތަކުގެ ސަބަބުންކަން މިނިސްޓަރު ފާހަގަކުރެއްވިއެވެ.
