ކޮވިޑް-19ގެ ތަފާތު ވޭރިއެންޓްތައް ދެނެގަތުމަށް ބޭނުންކުރާ ޖީން ސީކުއެންސް މެޝިނެއް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ރާއްޖެއަށް ހަދިޔާކޮށްފިއެވެ.
މި ޖީން ސީކުއެންސް މެޝިނާ ރާއްޖޭން ހަވާލުވެވަޑައިގަތީ ހެލްތު މިނިސްޓަރު އަހްމަދު ނަސީމެވެ.
މި މެޝިންގެ އެހީގައި ކޮވިޑް-19 ފެތުރޭ މިންވަރު ބެލުމާއި، ވައިރަސްގެ ހަރަކާތްތަކާއި، އެއަށް އަންނަ ބަދަލުތައް ދެނެގަތުމަށާއި، ބަލިމަޑުކަން ކޮންޓްރޯލް ކުރުމަށް އެހީތެރިވެދޭނެ ކަމަށް ބުނެއެވެ.
މީގެ ކުރިން ރާއްޖެއިން ޖީން ސީކުއެންސް ހަދަމުން ދިޔައީ ރާއްޖޭން ބޭރަށް ސާމްޕަލް ފޮނުވައިގެންނެވެ.
ނަމަވެސް ރާއްޖޭގައި އޭގެ މެޝިން ބޭނުންކުރަން ފެށުމުން އެކަމަށް ހޭދަވާ ވަގުތާއި ހަރަދު ކުޑަވެ، އަވަހަށް ފަސޭހަކަމާއެކު ކޯވިޑްގެ ވޭރިއަންޓްތައް ދައުރުވާ މިންވަރު ދެނެގަނެވޭނެ ކަމަށް ޑަބްލިއުއެޗްއޯއިން ވަނީ ބުނެފައެވެ.
