ދުނިޔޭގައި މަދުން ނޫން ނުފެންނަ ބައްޔެއް ކަމަށްވާ ހެލްކުއިން އައިޗްތިއޯސިސް ޑިސްއޯޑާއަށް ތަހައްމަލް ކުރަމުން ދިޔަ 9 މަހުގެ ޔޫނުސް ލަޔަކް ނިޔާވެއްޖެއެވެ.
ލަޔަކް ނިޔާވީ، އިންޑިއާގެ ބެންގަލޫރުގެ ހޮސްޕިޓަލެއަގައި ފަރުވާދެމުން ދަނިކޮށެވެ.
އޭނާ ބެންގަލޫރަށް ގެންދިޔައީ މިދިޔަ މަހުގެ 22 ވަނަ ދުވަހުއެވެ.
އޭނާ ބެންގަލޫރަށް ގެންދިޔައީ ނިއުމޯނިއާ ޖެހި، ހަންގަނޑު ވެސް ވަރަށް ބޮޑަށް އިންފެކްޓުވެގެން އިތުރު ފަރުވާއަށެވެ. ބެންގަލޫރުން ހެދި ޓެސްޓުތަކުން ލަޔަކްއަށް ލޭގެ އިންފެކްޝަން ޖެހިފައި ހުރިކަން އެނގުނުއިރު ލަޔަކްއަށް ފަރުވާ ދެމުން ދިޔައީ އައިސީޔޫގައެވެ.
ހެލްކުއިން އައިޗްތިއޯސިސްއަކީ ދުނިޔެއިން މަދުން ނޫނީ ނުފެންނަ ޖެނެޓިކް ބައްޔެކެވެ. މިބަލީގެ ސަބަބުން ލަޔަކްގެ މުޅި ގައިގެ ހަންގަނޑު ބޯވެފައި ހުރުމުގެ އިތުރުން މޫނުގެ ސިފައަށް ބަދަލު އައިސް ނޭވާލާން އުނދަގޫވެފައި ހުންނަ ކަމަށް ލަޔަކްގެ އާއިލާއިން އޭރު ވަނީ ބުނެފައެވެ. އަދި އޭނާ ފެނަށް ލައި ފޯކުރުމުން، އެ ހަންގަނޑު ނެއްޓުނު ނަމަވެސް އެ ތަންތަނުން ލޭ އަންނަ ކަމަށް ވެސް ބުންޏެވެ. އަދި ބޯވެފައިވާ ހަންގަނޑު ނުނެއްޓޭ ނަމަ، އިތުރަށް އޭގެ މައްޗަށް ހަން އަރައި، ހާލަތު އިތުރަށް ގޯސްވާ ކަމަށް ވެސް މީގެ ކުރިން އާއިލާއިން ވަނީ ބުނެފައެވެ.
