ވަގުތީ ބޮޑުވަޒީރަކު ކަނޑައެޅެންދެން، ޕާކިސްތާނުގެ ބޮޑުވަޒީރު ކަމުގެ މައްސޫލިއްޔަތުތައް އަދާ ކުރެއްވުން މަތީ ދެމިހުންނަވާނީ ހަމަ އިމްރާން ހާން ކަމަށް، ޕާކިސްތާނުގެ ރައީސް އާރިފް އާލްވީ އިއުލާން ކުރައްވައިފިއެވެ.
ޕާކިސްތާނުގެ ރައީސް މިކަން ހާމަ ކުރެއްވީ، މަގާމުގެ މައްސޫލިއްޔަތުތަކުން އިމްރާން އެކަހެރި ކުރެއްވިފައި ވާ ކަމަށް، ޕާކިސްތާނުގެ ކެބިނެޓް ސެކްރެޓަރީ، އިމްރާންއަށް އަންގަވާފައި ވަނިކޮށެވެ.
ބޮޑުވަޒީރު ކަމުގެ މަގާމުގައި އިމްރާން ދެމި ހުންނެވުމަށް އިތުބާރު ނެތް ކަމުގެ ވޯޓަކަށް އެހުމަށް، ޕާކިސްތާނުގެ ގާނޫނު ހަދާ މަޖިލީސް އާދީއްތަ ދުވަހަށް ތައްޔާރު ވެފައި ވަނިކޮށް، އިމްރާން ވަނީ އެ މަޖިލީސް އުވާލައްވާފައެވެ. ޕާކިސްތާނުގެ ރައީސްގެ ތާއީދުވެސް އެކަމުގައި އިމްރާންއަށް އޮތް ކަމަށް ހަބަރު ލިބެއެވެ. އަދި އޭނާގެ ސަރުކާރު ވައްޓާލުމަށް ބަޔަކު ރާވަމުން ދާ ކަމުގެ ތުހުމަތު، އިމްރާން ވަނީ ފެންމަތި ކުރައްވާފައެވެ.
އިމްރާންގެ އިތުބާރު ނެތް ކަމުގެ ވޯޓު މަޖިލީހުގައި ކުރިއަށް ގެންދިއުމަށް، މަޖިލީހުގެ ނައިބު ރައީސް ހުރަސް އެޅުއްވިއެވެ. އަދި އެއީ ޣައިރު ގާނޫނީ ވޯޓެއް ކަމަށްވެސް އޭނާ ވަނީ ވިދާޅުވެފައެވެ.
ޕާކިސްތާނުގެ ގާނޫނު ހަދާ މަޖިލީސް އުވާލެއްވުމަކީ ޣައިރު ގާނޫނީ ނިންމެވުމެއް ކަމަށް ޕާކިސްތާނުގެ އިދިކޮޅު ފަރާތްތަކުން ދަނީ ބުނަމުންނެވެ. ޕާކިސްތާނުގެ އިދިކޮޅު ފަރާތްތަކުން ވަނީ، އެ ގައުމުގެ ސުޕްރީމް ކޯޓަށްވެސް މި މައްސަލަ ވައްދާފައެވެ. މި މައްސަލަ، މިއަދުގެ ވަގުތެއްގައި އެކޯޓުގައި ކުރިއަށް ގެންދާނެ ކަމަށް ހަބަރު ލިބެއެވެ.
ކޯޓަށް މައްސަލަ ބަލައިގަންނަމުން އެކޯޓުން ވަނީ، މަޖިލީސް އުވާލެއްވުމާ ގުޅޭ ގޮތުން ރައީސްއާއި ބޮޑުވަޒީރުގެ އަމަލުފުޅުތައް ހުރި ގޮތަކީ ކޯޓަށް ރިއާޔަތް ކުރެވޭނެ ކަންތައްކަމެއް ކަމަށް ބުނެފައެވެ.
ޕާކިސްތާނުގެ ރައީސްގެ ރަސްމީ ޓްވިޓާ ހޭންޑްލްއިން ކުރެއްވި ޓްވީޓެއްގައި ވިދާޅުވެފައި ވަނީ، އެ ގައުމުގެ ގާނޫނު އަސާސީ 224 ވަނަ މާއްދާގެ 1 ވަނަ ނުކުތާގެ ދަށުން، ޕާކިސްތާނުގެ ބޮޑުވަޒީރު ކަމުގެ މަގާމުގައި އިމްރާން ދެމިހުންނަވާނެ ކަމަށެވެ.
ވަގުތީ ބޮޑުވަޒީރަކު އައްޔަން ކުރެއްވެންދެން 15 ދުވަހުގެ މުއްދަތަކަށް އިމްރާންއަށް މަގާމުގައި ދެމި ހުންނެވޭނެ ކަމަށް މައުލޫމާތު ލިބެއެވެ. ނަމަވެސް އިންތިހާބު ކުރެވިފައިވާ ސަރުކާރުގެ އެންމެ އިސްވެރިއަކަށް ނިންމެވޭ ނިންމެވުންތައް ނިންމެވުމުގެ ބާރު، އިމްރާންއަށް ނޯންނާނެ ކަމަށް ހަބަރު ލިބެއެވެ.
ޕާކިސްތާނުގެ ބޮޑުވަޒީރު ކަމުގެ ގޮނޑިކޮޅު އިމްރާންއަށް ރަސްމޫކޮށް ގެއްލިވަޑައިގަތީ، ގާނޫނު ހަދާ މަޖިލީސް އުވާލެއްވި ހިސާބުންނެވެ.
