ވައްކަން ކުރުމަށް ފަހު ފިލަން ދުވަނިކޮށް، ވައްކަން ކުރި މީހާގެ ފަހަތުން ފުލުހަކު ދުވެ، އޭނާ އަތުލައިގަންނަ ވީޑިއޯއެއް ސޯޝަލް މީޑިއާގައި އާންމުވެ، ވައިރަލް ވެއްޖެއެވެ.
އެ ވީޑިއޯއިން ފެންނަ ގޮތުގައި، ވައްކަން ކުރި ފިރިހެން މީހާގެ ފަހަތުން ފުލުސް އޮފިސަރު ބާރަށް ދުވެފައި ދެއެވެ. ވައްކަން ކުރި މީހާ ދުވީ ފުލުސް އޮފިސަރުގެ ކުރިން ކަމަށް ވިޔަސް، އޮފިސަރު ހަމަކުރުމުގެ ކުރިން އޭނާ ގެއެއްގެ ތެރެއަށް ވަދެ މައްޗަށް އަރައެވެ. ވަކި ހިސާބަކުން ދެ މީހުންވެސް ވަރުބަލިވެ، ކައްވެ، މައްޗަށް އަރަން ފެށީ ސިޑީގެ ރެއިލިންގައި ހިފަހައްޓަމުންނެވެ.
އެއަށްފަހު، އެ އިމާރާތުގެ ހަވަނަ ބުރީގެ ސިޑިމަތިން ފުލުސް މީހާއަށް އޭނާ އަތުވެއެވެ. އޭނާގެ ގިރުވާނުގައި (ލަފުގައި) ހިފައިގެން ފުލުސް އޮފިސަރު އޭނާ ތިރިއަށް ގެންދާ މަންޒަރު ފެނެއެވެ.
އެ ވީޑިއޯގައިވާ ފުލުސް އޮފިސަރަށް އާންމުންގެ ތެރެއިން ގިނަ ބަޔަކު ދަނީ ތައުރީފު ކުރަމުންނެވެ.
ފުލުހުން ބުނީ، ޗާންދަނީ މަގުގައި އިއްޔެ މެންދުރުފަހު 12:30 ހާއިރު ފުލުހުން ޕެޓްރޯލް ކުރަމުން ދިޔައިރު، ވަގަށް ނަގާފައިވާ ކަމަށް ބެލެވޭ ފޮށިގަނޑެއް ހިފައިގެން އުޅުނު އެ މީހާ ގާތު މަޑުކުރަން ފުލުހުން އެންގުމުން، އޭނާ މަޑުނުކޮށް ދިއުމުން، ފުލުހުން އޭނާ ހައްޔަރުކޮށްފައި ވާ ކަމަށެވެ.
އެ މައްސަލަ ތަހްގީގު ކުރަމުން ދާ ކަމަށް ފުލުހުން ބުންޏެވެ.
