ޕިކަޕަކަށް އަރުވަގެން ގެންދަނިކޮށް މަސްތުވާތަކެތި ކަމަށް ބެލެވޭ ގިނަ އަދަދެއްގެ ތަކެތި ފުލުހުން މިރޭ އަތުލައިގެންފިއެވެ.
ފުލުހުން މިތަކެތި އަތުލައިގެންފައި ވަނީ ސޯސަން މަގުން މިރޭ އިރާކޮޅުގެ ވަގުތެއްގައެވެ.
އެ ޕިކަޕް ހުއްޓުވާ، އޭގައި ހުރި މަސްތުވާތަކެތި ޕެކެޓްތައް މަގުމަތީ އަތުރައި ޕިކަޕް ފުލުހުން ވަނީ ފާސްކޮށްފައެވެ.
އަތުލައިގަތީ ކިހާ އަދަދެއްގެ މަސްތުވާތަކެއްޗެއް ކަމެއް އަދި އެއީ ކޮން ބާވަތެއްގެ މަސްތުވާތަކެއްޗެއް ކަމެއް އަދި ނޭނގެއެވެ. ފުލުހުން މިހާރުވެސް ސީންގައި ހަރަކާތްތެރިވާ އިރު، އެކަމާބެހޭ ތަފްސީލު ހޯދުމަށް އެހުމުން ޖަވާބެއް ނުދިނެވެ.
މަސްތުވާތަކެއްޗާ ދެކޮޅަށް ފުލުހުން ހިންގަމުން އަންނަ އޮޕަރޭޝަން ތަކުގައި ގިނަ އަދަދެއްގެ މަސްތުވާތަކެތި ދޭތެރެ ދޭތެރެއިން އަތުލައިގަނެއެވެ. ނަމަވެސް އެ މައްސަލަތަކުގައި ފުލުހުން ކަން ކުރާ ގޮތުން، ނުވަތަ ޗެއިން އޮފް ކަސްޓަޑީ ގޯސްވެގެން ގިނަފަހަރަށް މައްސަލަތައް ސާބިތެއް ނުވެއެވެ. ކޯޓު މަރުހަލާ ތަކުގައި ތުހުމަތުވާ އެންމެން ގިނަ ފަހަރު ހުރީ ދޫވެފައެވެ.
