ދައުލަތުން ކުރާ ކޮންމެ ޝަރުތެއް ކޮށްފައި ވިޔަސް ބަންދުން ދޫކޮށްލަ ދިނުމަށް ސީ ލައިފް ގްލޯބަލް ކުންފުނީގެ މެނޭޖިން ޑިރެކްޓަރު އަހުމަދު މޫސާ (އައްމަޓީ) ބަންދުން ދޫކޮށްލަން ކްރިމިނަލް ކޯޓުން ތިން ވަނަ ފަހަރަށް ހުކުމްކޮށްފިއެވެ.
ފްލެޓް އަޅައިދޭނެ ކަމަށް ބުނެ ސީލައިފް ކުންފުނިން ގިނަ ބައެއްގެ އަތުން ފައިސާ ނެގި މައްސަލާގައި އަންމަޓީ ހައްޔަރުކުރި ނަމަވެސް ކުރިމިނަލް ކޯޓުން ވަނީ އޭނާ ބަންދުން ދޫކޮށްލަން މީގެ ކުރިން ވެސް ދެ ފަހަރެއްގެ މަތިން ހުކުމްކޮށްފައެވެ.
މިއަދު ބޭއްވި އަޑުއެހުމުގައި އައްމަޓީ ފިލާފާނެ ކަމަށްޓަކައި އޭނާގެ ބަންދު ދެމެހެއްޓުމަށް ދައުލަތުން ވަނީ އެދިފައެވެ. ދައުލަތުން ވަނީ ހައްޔަރުކޮށްފައިވަނީ ހިޔާނާތްތެރި ވުމަށްފަހުގައި ފިލައިގެން ރާއްޖެއިން ބޭރުގައި ދިރިއުޅެމުން ދަނިކޮށްކަން ފާހަގަކޮށްފައެވެ. އަދި ދައުލަތަށް ރައްދު ދެއްވަމުން އައްމަޓީގެ ވަކީލު ވަނީ އޭނާ ފިލާނެ ކަމަށް ދެކެވޭ ތުހުމަތުތައް ދޮގު ކުރައްވާފައެވެ.
ދައުލަތުން ވަނީ އައްމަޓީގެ ސިއްހީ ސަބަބުތަކެއް ހުއްޓަސް ގަވާއިދުން އޭނާ ޑޮކްޓަރަށް ދައްކަމުން ގެންދާ ކަމަށާއި އަދި އޭނާގެ އޮޕަރޭޝަން ކުރުމަށްޓަކައި ޑޮކްޓަރުގެ އެޕޮއިންޓްމަންޓަށް ވެސް އެދިފައިވާ ކަމަށް ބުނެފައެވެ.
އައްމަޓީގެ ބައްޕަގެ ސިއްހީ ހާލަތު ވެސް ގޯސްވެފައިވާ ކަމަށާއި އެހެންކަމުން އޭނާ ދޫކޮށްލުމަށް ވަނީ އެދިފައެވެ. އައްމަޓީ ފިލުމުގެ ކިހާ މިންވަރުގެ ފުރުސަތެއް އެބައޮތްތޯ ސުވާލު ކުރެއްވުމުން ދައުލަތުން ބުނީ އައްމަޓީގެ އެފަދަ ރެކޯޑު އެބައޮތް ކަމަށެވެ. އެހެންނަމަވެސް ޝަރީއަތުން ނިންމާފައިވަނީ ޝަރުތުތަކެއް ކޮށް އައްމަޓީ މިނިވަން ކުރުމަށެވެ.
ޝަރީއަތް ނިމެންދެން ބަންދުގައި ހުއްޓާ މިދިޔަ އޮކްޓޯބަރު މަހު ކްރިމިނަލް ކޯޓުން ވަނީ އައްމަޓީގެ އެއްބަނޑު އެއްބަފާ ދެ މީހުން ޖާމިނުކޮށް ކަފާލާތުގެ ދަށުން، ޝަރުތުތަކަކާއެކު ދޫކޮށްލާފައެވެ. އޭނާ ފިލައިގެން ދުޔުމުގެ ފުރުސަތު އަދިވެސް އޮތް ކަމަށް ބުނެ ކްރިމިނަލް ކޯޓުން ކުރި ހުކުމް ބާތިލްކޮށް، އޭނާ ޝަރީއަތް ނިމެންދެން ބަންދު ކުރީ ހައިކޯޓުންނެވެ.
އެޗްޑީސީ އާއި ސީލައިފް ގްލޯބަލް އިންކް ޕްރައިވެޓް ލިމިޓެޑާ ދެމެދު މާޗް 13، 2014 ގައި ސޮއިކޮށްފައި ވާ އެއްބަސްވުމުގެ ދަށުން ހުޅުމާލޭގައި 3،000 ހައުސިން ޔުނިޓް އެޅުމަށް ސީލައިފްއާ ހަވާލުކޮށްފައި ވެއެވެ. ހުޅުމާލޭގައި 3،000 ފްލެޓް އަޅައިދޭނެ ކަމަށް ބުނެ އެތައް ބައެއްގެ އަތުން ބުކިން ފީގެ ގޮތުގައި ފައިސާ ނެގުމަށްފަހު ފައިސާ އަނބުރާ ނުދީ އަންމަޓީ ފިލައިގެން އުޅެނިކޮށް އޭނާ ރާއްޖެ ގެނެސް 42 ދައުވާއެއް ވަނީ އުފުލާފައެވެ. މިދިޔަ ސެޕްޓެމްބަރު މަހުގެ 13 ވަނަ ދުވަހު އޮތް އަޑުއެހުމުގައި އައްމަޓީ ވަނީ އެ ދައުވާތަކަށް އިންކާރުކޮށްފައެވެ.
