ޕާކިސްތާނުގެ ހުޅަނގުއުތުރުގެ ސިޓީއެއް ކަމަށް ވާ ޕެޝާވަރުގެ މިސްކިތެއްގައި ބާރުގަދަ ބޮމެއް ގޮއްވާލާ، 30 މީހުން މަރާލައިފިއެވެ.
ޝީއީން ބޭނުން ކުރަމުން ދިޔަ މިސްކިތުގައި ގޮއްވާލި ބޮމުގެ ސަބަބުން ގިނަ ބަޔަކު ޒަހަމް ވެފައި ވާއިރު، ޒަހަމްވީ މީހުންގެ ގިނަ ބައެއްގެ ހާލު ކުރިޓިކަލް ކަމަށް މައުލޫމާތު ލިބެއެވެ.
ބޮން ގޮއްވާލާފައި ވަނީ ކުޗާ ރިސާލްދާރް މިސްކިތުގައި، ހުކުރު ނަމާދަށް ޖަމާއަތް ހަދައިގެން ތިބި ވަގުތު ކަމަށް ހަބަރު ލިބެއެވެ.
ޕެޝާވަރު ފުލުހުންގެ އިސްވެރިޔާ މުޙައްމަދު އީޖާޒް ހާން ވިދާޅުވީ ހަމަނުޖެހުން ފެށުނީ ހަތިޔާރު އަޅައިގެން ތިބި 2 މީހަކު، މިސްކިތު ބޭރުގައި ތިބި ފުލުހުންގެ ގަޔަށް ބަޑި ޖެހި ހިސާބުން ކަމަށެވެ.
ބަޑީގެ ހަމަލާ ބަދަލު ކުރުންތަކުގައި ފުލުހެއްގެ އިތުރުން، ހަތިޔާރު އެޅީ މީހުންގެ ތެރެއިން އެކެއްގެ ފުރާނަ ގެއްލިފައި ވާ ކަމަށް މައުލޫމާތު ލިބެއެވެ. އިތުރު ފުލުހަކުވެސް ޒަހަމްވި ކަމަށް ހަބަރު ލިބެއެވެ.
ހަތިޔާރު އެޅި 2 މީހުންގެ ތެރެއިން ބާކީ ހުރި މީހާ މިސްކިތް ތެރެއަށް ވަދެ، ބޮން ގޮއްވާލީ ކަމަށް މައުލޫމާތު ލިބެއެވެ.
60 އަށް ވުރެ ގިނަ މީހުން ޒަހަމްވެފައި ވާ އިރު، ޒަހަމް ވީ މީހުންނަށް ފަރުވާ ދެމުންދާ ހޮސްޕިޓަލުން ވަނީ މަރުވި މީހުންގެ އަދަދު އިތުރުވުން އެކަށީގެން ވާ ކަމަށް ބުނެފައެވެ.
