ރަޝިއާއިން ވަރުގަދަ އަސްކަރީ އޮޕަރޭޝަނެއް ފަށާފައިވާ ޔޫކްރޭންގެ ފަސްގަނޑު، އަދުއްވުންގެ ކިބައިން މިނިވަން ކުރުމަށް، އާންމުންގެ ވީހާވެސް ގިނަ ބަޔަކު އަސްކަރިއްޔާއާ ގުޅުމަށް، ޔޫކްރޭންގެ ދިފާއީ ބާރުން ގޮވާލައިފިއެވެ.
މީގެ ކުޑަ ވަގުތު ކޮޅެއް ކުރިން ޔޫކްރޭންގެ އަސްކަރިއްޔާއިން ކުރި ޓުވީޓެއްގައި ބުނެފައި ވަނީ، ވަކި އުމުރަކަށް ބެލުމެއް ނެތް ކަމަށާ، ކުޑަ ކުދިން ކަމުގައި ވީ ނަމަވެސް ގައުމުގެ ދިފާއުގައި ނިކުތުމަށް ގޮވާލާ ކަމަށެވެ.
މިއަދު ޔޫކްރޭނަށް ލިބެން އޮތްހާ އެއްޗެއްގެ ބޭނުން ޖެހިފައި ވާ ކަމަށާ، އަސްކަރިއްޔާއާ ގުޅުމުގެ އިޖުރާއަތުތަކަށް ލުއި ދީފައި ވާ ކަމަށް އެ ގައުމުގެ އަސްކަރިއްޔާއިން ކުރި ޓްވީޓްގައި ބުނެފައިވެއެވެ. ޔޫކްރޭންގެ އަސްކަރިއްޔާއާ ގުޅުމަށް ބޭނުންވާ ހަމައެކަނި އެއްޗަކީ ޕާސްޕޯޓާއި އައިޑެންޓިޓީ ނަމްބަރު ކަމަށްވެސް މައުލޫމާތު ލިބެއެވެ.
އަސްކަރިއްޔާއަށް ރެކްރޫޓު ވުމުގައި ހުރަސްތައް ކުރިމަތިވާނަމަ، ޓްވީޓަށް ރިއާޔަތް ކުރުމަށްވެސް ޔޫކްރޭންގެ އަސްކަރިއްޔާއިން ވަނީ ބުނެފައެވެ.
ޔޫކްރޭނުން އިއްވެސް ވަނީ ގައުމުގެ ދިފާއުގައި ނިކުންނަ ކޮންމެ މީހަކަށްވެސް ހަތިޔާރު ފޯރުކޮށްދޭނެ ކަން ހާމަކޮށްފައެވެ.
