އައިޖީއެމްއެޗްގައި މަސައްކަތްކުރި ފިލިޕީންސް ނަރުހެއް ކަމަށްވާ މޭރީ ގްރޭސް މަރާލި މައްސަލާގައި ހައްޔަރުކުރި އޭނާގެ ފިރިމީހާ މާވިންގެ ދިވެހި ލޯބިވެެރިޔާ، ހަލީމަތު ލަމްހާ އަބްދުއްރަހުމާންގެ ގެއިން ފެނުނު އެންޖެކްޝަނެއްގެ އަސަރު މޭރީގެ ލެއިން ފެނިފައިވާ ކަމަށް ދައުލަތުން ބުނެފިއެވެ.
މިއަދުގެ ޝަރީއަތުގައި ދައުލަތުގެ ވަކީލު އަހްމަދު ނައުފަލް ވިދާޅުވީ، މޭރީގެ ޓޮކްސޮލޮޖީ ރިޕޯޓް ލިބިފައިވާ ކަމަށާއި އޭގައިވާ ގޮތުން މޭރީގެ ލޭގައި ސަކްސިނައިލްކޮލިންގެ އަސަރު އެބަހުރި ކަމަށެވެ.
ރާއްޖޭން ބޭރުން ހެދި މި ޓެސްޓްތަކުގެ ރިޕޯޓް ވަރަށް އަވަހަށް ލިބޭނެ ކަމަށް އޭނާ ވަނީ ވިދާޅުވެފައެވެ.
މީގެ އިތުރުން ފިޒިކަލް އެގްޒަމިނޭޝަން ރިޕޯޓް ހަވާލާދީ ނައުފަލް ވިދާޅުވީ ސަކްސިނައިލްކޮލިން އިންޖެކްޝަންގެ 10 އެމްއެލް ހުންނަން ޖެހޭ އެއްޗެއްގައި ބާކީ ހުރީ ހަތަރު އެމްއެލް ކަމަށެވެ. އަދި އޭގެ ސީލް ވެސް ހަލާކުވެފައިވާ ކަން ފާހަގަކުރައްވާ ނައުފަލް ވިދާޅުވީ މޭރީގެ ހަށިގަނޑުގައި ވެސް އިންޖެކްޝަން ޖަހާފައި ހުރި ފަދަ ނިޝާންތަކެއް ފެނިފައިވާ ކަމަށެވެ.
ލަމްހާ އަބްދުއްރަހުމާންގެ މައްޗަށް ވަނީ ތިން ދައުވާއެއް ކޮށްފައެވެ. އެ ތިން ދައުވާތަކަކީ އެނގިހުރެ މީހަކު މެރުމުގައި ބައިވެރިވިކަމުގެ ދައުވާއާއި އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށުގެ ދައުވާއާއި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ކުށުގެ ދައުވާއެވެ.
ލަމްހާގެ މައްޗަށް މި ތިން ދައުވާ ސާބިތުވެއްޖެ ނަމަ، އޭނާގެ މައްޗަށް ދިހަ އަހަރާއި ހަތަރު މަހާއި 24 ދުވަހުގެ ޖަލު ހުކުމެއް އަންނާނެއެވެ.
ފިލިޕީންސަށް ނިސްބަތްވާ، އައިޖީއެމްއެޗްގެ ޑައަލިސިސް ޔުނިޓުގައި މަސައްކަތް ކުރާ މޭރީ ގްރޭސް މަރުވީ ދަންޖެހިގެން ކަމަށް ބުނެ ސޯޝަލް މީޑިއާގައި މިދިޔަ އޮކްޓޯބަރު މަހު ވަނީ ހަބަރު ފަތުރާފައެވެ. ނަމަވެސް އޭނާ މަރުވީ ބޮލަށް ލިބުނު ބޮޑެތި ޒަހަމްތަކާ ގުޅިގެން ކަމަށް ފުލުހުން މީގެ ކުރިން ވަނީ ބުނެފައެވެ.
